33,388 total reads
Nanawagan ang Alliance of Concerned Teachers (ACT) sa pamahalaan na tugunan ang matagal nang panawagan ng mga guro para sa mas mataas na sahod, dagdag benepisyo, sapat na personnel, at mas malaking pondo para sa edukasyon ngayong paggunita sa World Teachers’ Day.
Sa panayam sa programang Veritas Pilipinas, sinabi ni ACT National Chairperson Ruby Bernardo na ang World Teachers’ Day ay hindi lamang pagkakataon para kilalanin ang mga guro, kundi panahon din upang bigyang-pansin ang kanilang kalagayan sa trabaho, sahod, at mga benepisyo.
“Dahil nga Teachers’ Day ngayon, at gusto namin talagang iparinig doon sa ating mga nasa posisyon ‘yung aming mga demands for World Teachers’ Day. Kasi sabi namin, ang esensya po ng World Teachers’ Day, kung babalikan din natin historically, ay pagkilala doon sa natatanging papel ng ating mga guro, at pagkilala din nung kanilang kalagayan sa usapin ng sahod, benepisyo, at ‘yung kalagayan nila sa paggawa.” Bahagi ng pahayag ni Bernardo sa Radyo Veritas.
Kabilang sa pangunahing panawagan ng ACT ang ₱50,000 entry-level salary para sa mga guro at pagtataas ng Personnel Economic Relief Allowance (PERA) mula ₱2,000 tungo sa ₱5,000.
Binigyang-diin din ni Bernardo ang pangangailangan ng mas maraming mental health personnel at pagkilala sa mga registered guidance counselors sa mga paaralan.
Ayon sa kanya, dapat na ma-reclassify sa Salary Grade 18 ang mga registered guidance counselors, na nananatili sa Salary Grade 11.
Iniuugnay ito ng ACT sa pangangailangan na mapalakas ang mental health services at prevention programs sa mga paaralan, lalo na sa gitna ng mga insidente ng school-related violence at bullying.
“Dapat bigyan talaga ng recognition ‘yung ating mga registered guidance counselors. At siyempre dagdagan ito, lalo pa’t nakikita natin for the past days ‘yung 10 school-related violence incidents na nangyayari sa mga eskwelahan. Marami diyan bullying, kaya dapat talaga magkaroon ng prevention doon sa mga eskwelahan natin. Pero paano nga namin ‘yun gagawin kung kulang ‘yung ating mga personnel sa eskwela?” Dagdag pa ni Bernardo.
Iginiit din ni Bernardo na kailangang mabawasan ang clerical at administrative work ng mga guro upang makapagpokus sila sa pagtuturo.
“Ang gusto natin para makatulong din sa mga estudyante natin—I mean, sa mga teachers natin, maka-focus sa pagtuturo para ‘yung mga estudyante natin ay matuto.” Ayon pa kay Bernardo.
Kabilang sa binanggit na mga pasanin ni Bernardo ang paperwork, manual na school forms at iba pang gawaing hindi direktang kaugnay ng pagtuturo.
Nanawagan din ang ACT ng mas malawak na digitalization at pagkakaroon ng education support personnel na tutulong sa mga gawaing administratibo.
ARAL Program, education budget at learning recovery
Samantala isa rin sa binigyang-diin ni Bernardo ang usapin ng pondo para sa Academic Recovery and Accessible Learning (ARAL) Program, kung saan sa proposed 2027 national budget, walang inilaan na pondo para sa ARAL sa National Expenditure Program, dahilan upang humingi ang DepEd ng ₱9.98 bilyon para maipagpatuloy ang programa, habang halos ₱9 bilyon ang inilaan para sa ARAL sa 2026 national budget.
Para kay Bernardo, mahalaga ang programa sa pagtugon sa learning gaps ngunit hindi dapat ang mga guro lamang ang sumalo sa dagdag na tutoring responsibilities.
“Edi Thank You na lang ‘yung mga ine-extend na oras ng mga teachers natin for tutoring. Kaya dapat ibalik po talaga ‘yung ₱44.5 billion na kinaltas sa DepEd at ilagay po dito sa recovery program na ito kasi malaking tulong din po eh sa mga estudyante natin ‘yung mga tutorial classes after classes.” Ani Bernardo.
Nanawagan din siya ng sapat na hiring upang matugunan ang kakulangan sa mga guro at iba pang education personnel.
“Pero bukod doon, ito pa po, Ma’am Jing, ‘yung zero budget for hiring, ‘yun ‘yung problema natin. Kasi ‘yung mga teachers na umaasa para doon sa ano sana, makapasok sa mga schools natin ay hindi nga po nangyayari.” Dagdag pa ni Bernardo.
Ang panawagan ng ACT ay kasabay ng patuloy na deliberasyon sa 2027 national budget at ng mga panukalang dagdagan ang pondo para sa edukasyon.
Iniulat din ng ACT na nais nitong itaas ang education spending sa katumbas ng 6% ng GDP upang matugunan ang kakulangan sa classrooms, learning resources, personnel at iba pang pangangailangan sa mga paaralan.
Korapsyon at pananagutan sa edukasyon
Bukod sa sahod at working conditions, binigyang-diin din ng ACT ang kahalagahan ng transparency at accountability sa paggamit ng pondo para sa edukasyon.
Sinabi ni Bernardo na nakababahala para sa mga guro ang mga alegasyon ng bribery at iba pang anyo ng korapsyon dahil habang may mga pondong nasasayang, patuloy namang nakararanas ang mga estudyante ng kakulangan sa classrooms, electric fans at iba pang pangunahing pangangailangan.
“Kasi ayaw natin talaga ng anomang porma ng korapsyon at ‘yung paggamit mismo ng pera para sa sariling interes. Kasi nakakasakit ng puso na ‘yung mga bata nakikita natin sa araw-araw, naiinitan, kulang ‘yung electric fan, masikip ‘yung classroom, hindi natututo, tapos meron tayong perang sinasayang na sana ginagastos doon sa pang-araw-araw na kailangan ng ating mga estudyante at siyempre doon sa eskwelahan natin.” Pagbabahagi pa ni Bernardo.
Bilang bahagi ng kanilang advocacy, sinabi ni Bernardo na naghanda ang ACT ng pro forma lesson plan na maaaring gamitin ng mga guro sa iba’t ibang asignatura upang maituro sa mga estudyante ang transparency, accountability, honesty at anti-corruption.
“Kahit nga sa eskwelahan nakalagay ‘Honesty is the best policy,’ kaya dapat isinasabuhay namin talaga ito.” Ayon pa kay Bernardo.
Sa paggunita sa World Teachers’ Day, muling ipinapaalala ng panawagan ng ACT na ang pagkilala sa mga guro ay hindi lamang nasusukat sa pagbibigay-pugay sa kanilang mahalagang papel, kundi pati sa pagtiyak na mayroon makatarungang sahod, sapat na suporta, ligtas na lugar ng paggawa at kondisyong magbibigay-daan upang makapagtuon ang mga guro sa pangunahing misyon ng pagtuturo.




