3,220 total reads
Naglabas ang Archdiocese of Manila ng mga panuntunan para sa pagdaraos ng 2026 Simbang Gabi o Misa de Aguinaldo, upang matiyak ang maayos at wastong pagdiriwang ng tradisyong Katoliko bilang paghahanda sa Pasko.
Sa liham sirkular na inilabas noong Nobyembre 12, 2026 binigyang-diin ni Manila Archbishop Jose Cardinal Advincula ang kahalagahan ng paghahanda sa pagsilang ni Hesukristo sa pamamagitan ng tradisyong siyam na araw na Misa bilang parangal sa Mahal na Birheng Maria, ang ina na nagdalang-tao sa Tagapagligtas.
Ayon sa liham sirkular, ang tradisyong ito ay isinasagawa bilang pagpapahayag ng pananampalataya at sama-samang paghahanda ng mga mananampalataya sa pagdiriwang ng Pasko.
Pinahihintulutan ang pagsisimula ng mga panggabing Simbang Gabi nang hindi mas maaga sa alas-sais ng gabi, habang ang huling Misa sa madaling-araw o umaga ay maaaring magsimula nang alas-5:30 ng umaga.
Para naman sa mga panggabing Misa tuwing karaniwang araw, maaaring gamitin ang mga pagbasa at panalangin para sa susunod na araw bilang pastoral accommodation.
Gayunman, hindi ito pinahihintulutan sa Misa tuwing Linggo ng gabi upang mapanatili ang natatanging kahalagahan ng Araw ng Panginoon.
Nilinaw din ni Cardinal Advincula na kailangang gamitin ang Gloria at puting kasuotan ng pari sa lahat ng Simbang Gabi, kabilang ang mga Misa tuwing Linggo, habang ang Credo o pagpapahayag ng pananampalataya ay isasama lamang tuwing araw ng Linggo.
Sa mga Simbang Gabi tuwing Linggo, mananatiling gagamitin ang mga pagbasa at panalangin para sa araw na iyon, kasama ang Gloria, Credo at puting kasuotan.
Samantala, sa mga regular na Misa tuwing Linggo na hindi bahagi ng Simbang Gabi, violet vestments ang gagamitin at hindi isasama ang Gloria.
Kinakailangan naman ang pahintulot ni Cardinal Advincula para sa pagdaraos ng Simbang Gabi sa mga kapilya, tanggapan at iba pang lugar na hindi saklaw ng mga kinikilalang Simbahan, dambana, chaplaincy at mga kapilyang kinikilala ng parokya kung saan regular na ipinagdiriwang ang Banal na Misa.
Layunin ng mga panuntunang ito na mapanatili ang wastong pagdiriwang ng liturhiya habang pinahahalagahan ang tradisyong Simbang Gabi bilang paghahanda ng sambayanan sa pagsilang ni Kristo.
