Mga Kapanalig, noong nakaraang linggo, inilabas ng Intergovernmental Panel on Climate Change (o IPCC) ang isa sa mga serye ng reports nila tungkol sa kalagayan ng ating planeta. At ang hindi magandang balita, “code red” na o sobrang peligroso na ang kalagayan ng ating planeta dahil sa climate change. Dahil dito, inaasahang mas lalalâ pa ang mga heatwaves, tagtuyot, pag-ulan, at pagbaha. Ayon sa United Nations, kakayanin natin itong tugunan kung agad tayong aaksyon.
Ang ulat ng IPCC ay inilabas tatlong buwan bago ang UN Climate Change Conference of the Parties na gagawin sa United Kingdom at layong talakayin ang mga dapat gawin upang tugunan ang mga hamong dala ng climate change. Binigyang-diin ng report na hindi na maipagkakaila ang epekto ng mga ginagawa nating mga tao sa pag-init ng mundo na siyang nagpapabago sa temperatura sa lupa at dagat. Sa nakalipas na limampung taon, pataas nang pataas at pabilis nang pabilis ang pag-init ng mundo. Dahil dito, nararanasan sa iba’t ibang bahagi ng mundo ang malulubhang pagbabago sa klima. Dito sa Pilipinas, naging mas malakas ang pag-ulan at mas matindi ang init ng panahon. Minsan ay hindi na natin matantya ang magiging panahon sa araw-araw. Sa ibang bansa naman, nalulusaw na ang mga yelo sa kabundukan, at bumabaha sa mga bansang dati ay bihirang dalawin ng ganitong kalamidad. Maraming lugar din ngayon—katulad ng Amerika, Greece, at Turkey—ang nakararanas ng wildfires.
Tayong nasa Pilipinas ang isa sa maituturing na pinaka-vulnerable o lantad sa epekto ng climate change. Kung kaya’t noong 2015, habang binubuo ang Paris Agreement, isa tayo sa mga bansang naggiit ng pangangailangang bawasan ang tinatawag na carbon emissions ng malakaki at mayayamang bansa. Commitment naman natin sa UN na bawasan ng 75% ang ating carbon emissions pagdating sa taóng 2030, ngunit malaking bahagi nito ay posible lamang kung tutulungan tayo ng ibang bansa.
Ayon sa mga mga grupong nangangalampag sa pamahalaan upang aksyunan ang climate change, maibababa lamang ang carbon emissions ng bansa kung maglalaan ito ng sapat na pondo para sa mga hakbang na gagawin. Ayon sa grupong Power for People Coalition (o P4P), kailangan ang unti-unti nating pag-alis sa pagdepende sa fossil fuels at paglipat sa mas malinis na mapagkukunan ng enerhiya at kuryente. Kayang-kaya natin ito dahil sagana ang ating bansa sa init ng araw, hangin, init mula sa ilalim ng lupa, at lakas ng alon ng dagat.
Maaaring napakalaking isyu ng climate change at napakaliit nating mga tao upang labanan ito. Ngunit sabi nga ng IPCC, bunga ang climate change ng ating kapabayaan. Gaya ng sinabi ni Pope Saint John Paul II sa isa niyang homilya noong 1987, hindi tayo patuloy na hahandugan ng biyaya ng mundo kung hindi tayo magiging tapat na tagapangalaga nito. Aniya, “We cannot say we love the land and then take steps to destroy it for use by future generations.” Kung mahal natin ang nag-iisa nating tahanan, kailangan nating gumawa ng mga hakbang upang ipakitang mahalaga ito hindi lamang para sa atin kundi pati sa mga susunod na henerasyon.
Mga Kapanalig, biniyayaan tayo ng Diyos ng isang tahanang mayaman sa biyaya at nagbibigay-buhay, ngunit gaya ng sinabi niya sa Jeremias 2:7, “dinungisan [ng mga tao] ang ibinigay kong lupain dahil sa karumal-dumal nilang mga gawain.” Kasalanang maituturing ang hindi pangangalaga sa kalikasan, ngunit hindi pa huli ang lahat. Makibahagi tayo sa pagkalampag sa pamahalaan at sa pagpapaalala sa bawat isa sa ating gampanan ang ating responsibilidad na pangalagaan ang ating mundo. Tunay na isa itong hamon, ngunit ito ay ating tungkulin bilang mabubuting Kristiyano.
