316 total views
Maihahalintulad ni Prelatura ng Batanes Bishop Camilio Gregorio sa bagyong Yolanda ang bagyong Ferdie na nanalasa sa kanilang diyosesis.
Dahil dito, nanawagan ng tulong si Bishop Gregorio sa Caritas Manila at ilang mga concerned institutions lalo na sa pagpapagawa muli ng kanilang Katedral, kumbento at palasyo ng obispo na halos sinira ng bagyo.
Iginiit rin ni Bishop Gregorio bagaman walang naitalang casualties sa kanilang prelature ay nangangailangan pa rin ang kanilang prelatura ng mga kagamitan para maayos ang mga nasirang pasilidad.
“Ang nangyari pa dumating yung bagyo earlier than expected. So it was lahat na nasurprise nagulat, talagang napakalakas yung ating Cathedral was blown off. Yung buong kumbento ng mga pari was washed off. Buti nalang yung Bishop’s house na save pero natanggal lahat ng mga bintana, virtual swimming pool yung Bishops’ house. Ang masakit lang, yung mga bahay, mga buildings lahat yun nag suffer,” bahagi ng pahayag ni Bishop Gregorio sa panayam ng Veritas Patrol.
Nag – alay rin ng panalangin ng pasasalamat si Bishop Gregorio lalo na sa presensya ng mga tao at institusyon na nagpapa – abot ng kanilang tulong at malasakit lalo na ang Archdiocese of Manila.
“Panginoong mahabagin at maawaing Panginoon, tunghayan mo ang mga tao, ang mga kapatid namin sa Batanes, na nasalanta ng bagyo, hirap na hirap sila ngayon mag reconstruct. Tulungan niyo po kami at kami ay nagpapasalamat at walang nasawi. Babangon po kami sa tulong ng inyong awa. Panginoon, basbasan po ninyo ang lahat ng mga taong tumulong sa amin, lalo na ang Veritas, Caritas at ang Archdiocese of Manila. Lahat lahat ng mga obispo at mga kaparian, lahat lahat ng mga very very generous faithful na concerned sa aming sitwasyon. Dear Lord, thank you so much for being so good to us despite of everything. Lord, have mercy on us,” bahagi ng panalangin ni Bishop Gregorio sa Radyo Veritas.
Samantala mula sa ulat ng National Disaster Risk Reduction and Management Council o NDRRMC na umabot sa 409 o may kabuuang 1529 na tao ang naapektuhan ng bagyo mula sa Batanes hanggang Cagayan sa pagtama ng bagyong Ferdie sa Hilagang Luzon.
Nauna na ring umapela ng tulong at panalangin si Manila Archbishop Luis Antonio Cardinal Tagle sa Batanes at hinimok ang mga mananampalataya na magpa – abot ng kanilang pagmamalasakit sa mga nasalanta ng kalamidad.
