882 total reads
Kapanalig, pumili tayo ng tamang panig na ating aaniban. Marami sa ating paligid ngayon ang nagyayakag na sumanib at magkaisa. Ingat tayo dahil maaring hindi people’s movement o simbahan, o team ang ating masalihan. Maaring kampon, sindikato, o organisadong panloloko ang makadale sa atin. Hindi lahat ng unity o pagkakaisa, ay para sa tao.
Makikita na lamang natin ito sa ating mga facebook groups. Ikaw ba kapanalig, ay maraming mga sinalihang facebook groups noon at ngayon? Naranasan mo ba na biglang nagbago ang pangalan ng facebook group mo? Bigla ka bang nalito na ang dating mong group na ukol sa history lamang ang usapan noon ay naging puro ukol na sa kandidato ang laman? Biglang tila naging troll farm ang group mo, at ikaw ay maari pang mapatalsik kung di aayon.
Naku, kapanalig. Naging malaking industriya na nga ang troll farm sa ating bayan. Nitong nakaraang taon, nanawagan na nga ng imbestigasyon ang senado ukol dito. Dahil sa troll farms, naging organisado at digital na ang panlilinlang sa mamamayan. Ang bayan na nga natin ang nangungunang research site ukol sa troll farms, dahil ito ang isa sa pangunahing rason ng pagkapanalo ng kasalukuyang rehimen sa ating bayan. Sukdulan nilang nagamit ang social media upang mapabango ang kanilang pangalan habang puro fake news naman ang lumalabas sa kanilang mga kalaban.
Ayon nga sa isang report mula sa University of Leeds, malawak na ang pagkalat ng fake accounts at paid influencers sa ating bayan. Sa pamamagitan nila, namamanipula ng mga political at PR strategists ang opinion, persepsyon, at pagpapasiya ng mga mamamayan. Networked disinformation na kanapalig, ang nagyari, ayon sa report, kung saan ang mga digital strategists ay nagtatrabaho kasama ang mga online celebrities na may may mga tig 50,000 hanggang 2 million followers. Minsan, mas marami pa. Meron ding mga social media workers ang sumasideline gamit ang mga fake accounts sa Facebook at Twitter. Kaya nilang abutin ang humigit kulang na 73 million social media users sa ating bansa – mas madami pa ito kapanalig, sa tinatayang mga 62 million voters natin ngayong taon.
Kapanalig, huwag sana tayong malinlang ulit ng mga troll farms ngayong eleksyon. Nakita na natin ang modus operandi nila, huwag na sana tayong magpadala. Sa halip na sumanib sa troll farms, dapat tayo ay maging fact checker kapanalig. Dito natin masisiguro na katotohanan ang maglilipana sa ating bayan, hindi ang panlilinlang. Walang katahimikan diyan, kapanalig, walang kapayapaan. Ang pagpapalaganap ng katotohanan ay ating obligasyon. Ayon nga sa Octogesima Adeveniens: Tungkulin ng Simbahan na tulungan ang mga mamamayan na tuklasin ang katotohanan.
Sumainyo ang Katotohanan.
