731 total reads
Nanawagan ang Catholic Bishops’ Conference of the Philippines – Episcopal Commission on Prison Pastoral Care sa namamahala sa mga bilangguan sa bansa kaugnay sa karapatang makaboto ng mga Persons Deprived of Liberty (PDL) para sa May 9, 2022 elections.
Ayon kay Legazpi Bishop Joel Baylon – Chairman ng kumisyon, mahalagang tiyakin ng namamahala sa mga bilangguan na mapanatili at magamit ng mga PDLs ang kanilang karapatang bumoto kahit nakakulong.
“If there is any concern that I’d like to address, it is addressed to those in charge of our prisons, that they assure those PDLs who have the right to vote be given this opportunity to exercise this right.” pahayag ni Bishop Baylon sa Radio Veritas.
Ipinaliwanag ni Bishop Baylon na sa kabila ng sitwasyon at pagkakabilanggo ng mga P-D-L ay mayroon patas na karapatan at tungkulin ang mga ito na maghalal ng mga karapat-dapat lider ng bansa.
Nilinaw ng Obispo na walang pinagkaiba ang panawagan ng Simbahang Katolika sa bawat botante at sa mga P-D-L na bumoto para sa kabutihan at kapakanan ng bayan batay sa katotohanan, konsensya, paniniwala at pananampalataya.
“I don’t think PDLs need to be addressed as a special group since what is expected of everybody is expected of them as well – which is, to vote wisely upholding always the truth, justice & concern for the common good, when they cast their votes.” Dagdag pa ni Bishop Baylon
Batay sa tala ng Commission on Elections (COMELEC) at Bureau of Jail Management and Penology (BJMP) may aabot sa 51,700 ang bilang ng mga rehistradong botante na mga Persons Deprived of Liberty (PDL) na maaaring bumoto sa halalan sa ika-9 ng Mayo, 2022.
Sa ilalim ng panuntunan ng COMELEC para sa Persons Deprived of Liberty (PDL) Voting, tanging national positions lamang ang kabilang sa kinakailangang ihalal ng mga ito na kinabibilangan ng pangulo, pangalawang pangulo, 12-senador at isang party-list group.
Magtatakda ng mga jail facility ng Special Polling Place kung saan maaaring bumoto ang mga rehistradong PDLs mula alas-7 ng umaga hanggang alas-2 ng hapon sa mismong araw ng halalan sa ika-9 ng Mayo, 2022
