Bilang bahagi ng paghahanda sa ika-500 taon ng Kristiyanismo sa Pilipinas at pag-alaala sa ginanap na unang binyag sa bansa, inilaan ng Archdiocese of Manila ang limang linggo ng Kwaresma sa pagbibigay ng tuon sa kahalagayan ng binyag.
Ayon kay Manila Apostolic Administrator Bishop Broderick Pabillo, ang Baptismal Catechism ay ang pagtalakay at pagbibigay ng tuon sa binyag.
“Tuwing linggo ng Kuwaresma, isang element ng binyag ang ating binibigyang halaga. Tulad last Sunday, binigyang halaga natin ang ‘baptismal promises o baptismal commitment’. Ngayong linggo ang bibigyan natin ng halaga yung ‘puting damit’ na isusuot sa atin, Transfiguration of the Lord. So, kada linggo may isang element na nagbibigay ng halaga sa binyag,” paliwanag ni Bishop Pabillo sa Pastoral visit sa Veritas.
Pagbibigay diin pa ni Bishop Pabillo na ang kapangyarihan ng binyag ay hindi lamang pag-aalis ng original sin kundi ang pagiging anak ng Diyos.
“Pero ang mas mahalaga tayo ay naging anak ng tayo ng Diyos at tayo ay naging bahagi ng simbahan kaya tayo ay nagtutulungan kasi tayo ay mga binyagan,” ayon pa kay Bishop Pabillo.
Sa ika-14 ng Abril ay muling gugunitain ng iba’t-ibang simbahan ang naganap na unang binyag sa Pilipinas kung saan may 500-sanggol ang bibinyagan sa ilang parokya kabilang na sa Archdiocese ng Cebu ang itinuturing na sentro ng pananampalatayang Katoliko.
Una na ring pinalawig ng Catholic Bishops’ Conference of the Philippines (CBCP) ang isang taon ang pagdiriwang ng 500 years of Christianity hanggang 2022 dulot na rin sa pandemya.
Kung saan hinikayat ang bawat simbahan na magkaroon ng mga lokal na pagdiriwang sa bawat diyosesis sa buong bansa.
