9,164 total reads
Nagpahayag ng pakikiisa at panalangin si Bishop Ruperto Santos para sa mga Pilipinong seafarers na humaharap sa matinding panganib at pangamba habang naglalayag sa iba’t ibang bahagi ng mundo.
Ito ang mensahe ng obispo kasunod ng mga insidente ng drone attacks sa Straits of Hormuz at sa banta ng hantavirus na nakaapekto sa ilang Filipino crew members.
Bilang CBCP Bishop Promoter ng Stella Maris-Philippines, kinilala ni Bishop Santos ang takot, pangamba, at hirap na dinaranas ng mga marino na malayo sa kanilang pamilya habang nagpapatuloy ang tensyon sa Gitnang Silangan.
“Though miles separate us, please know that you are close to our hearts, our prayers, and our thoughts every day,” ayon kay Bishop Santos.
Ayon pa sa obispo, marami sa mga seafarers ang nakararanas ng matinding pangamba para sa kanilang kaligtasan at kinabukasan bunsod ng banta sa kanilang seguridad at kalusugan.
“Some of you may feel helpless, worried, or even forgotten. But please remember this: you are not alone,” giit ng obispo.
Hinimok din nito ang mga marino na manatiling matatag at kumapit sa pananampalataya sa gitna ng krisis.
“Hold firmly to hope. Never allow despair to overcome your spirit,” saad ni Bishop Santos.
Tiniyak naman ng Simbahan ang patuloy na pananalangin para sa proteksyon, kaligtasan, at kapakanan ng mga overseas Filipino seafarers.
Nanawagan din ang obispo ng agarang pagtataguyod ng kapayapaan upang matigil ang karahasan at panganib na naglalagay sa alanganin sa buhay ng libu-libong manggagawa sa karagatan.
“We continue to pray fervently for your protection, safety, and sound mental and emotional health. We pray that peace may soon prevail and that the violence and war may come to an end,” ayon pa kay Bishop Santos.
Kinilala rin ng obispo ang mahalagang ambag ng mga Pilipinong marino sa kanilang pamilya at sa bansa sa kabila ng mga sakripisyo at panganib na kanilang kinahaharap.
“You have sacrificed so much for your families and for our nation. Your hard work, courage, and perseverance are deeply valued and appreciated,” dagdag pa ni Bishop Santos.
Dalangin din ng obispo ang ligtas na pagbabalik ng mga seafarers sa Pilipinas at tiniyak na hindi sila pinababayaan ng Diyos sa gitna ng kanilang pinagdaraanan.
Kamakailan ay kinumpirma ng Department of Migrant Workers na pitong Filipino seafarers ang nasugatan sa pag-atake ng Iran sa Maltese-flagged container ship na CMA CGM San Antonio noong May 5.
Samantala, nasa 38 namang Pilipino ang sakay ng cruise ship na M/V Hondius na kasalukuyang sumasailalim sa quarantine sa Rotterdam dahil sa banta ng hantavirus.
