470 total views
Napaabot ng pagbati ang Kanyang Kabunyian Luis Antonio Cardinal Tagle kay Taytay Bishop Broderick Pabillo sa pagkakaluklok bilang pinuno ng isa sa bikaryato ng Palawan.
Naniniwala si Cardinal Tagle na sa pamamagitan ni Bishop Pabillo ay mararanasan at matatagpuan ng bawat mananampalataya ang kabutihan ng Panginoon.
Tiniyak din ni Cardinal Tagle ang pananalangin para kay Bishop Pabillo sa kanyang bagong misyon matapos ang 15-taong paglilingkod sa Archdiocese of Manila.
“I pray for you and the Vicariate of Taytay in a special way on this day of your installation. God will show His faithfulness to His people through you, and you will see God’s grandeur through them,” mensahe ni Cardinal Tagle kay Bishop Pabillo sa Facebook post ng Archdiocese of Manila – Office of Communications.
Si Bishop Pabillo ay naging katuwang ni Cardinal Tagle sa loob ng siyam na taon na nagsilbing Arsobispo ng Maynila bago itinalaga ng Santo Papa Francisco bilang Prefect of the Congregation for Evangelization of Peoples na nakabase ang tanggapan sa Roma.
Ang Apostolic Vicariate of Taytay, Palawan ay nasa pangangasiwa ng Prefect of the Congregation for Evangelization of Peoples na pinamumunuan ni Cardinal Tagle.
Si Cardinal Tagle ay kasalukuyang nasa bansa para sa isang maikling bakasyon.
August 19 naman nang iluklok sa Apostolic Vicariate of Taytay, Palawan si Bishop Pabillo sa isang payak na pagdiriwang na ginanap sa St. Joseph the Worker Cathedral na pinangunahan ni Puerto Princesa Palawan Bishop Socrates Mesiona.
