285 total views
Pormal nang binuo ng Kamara de Representantes ang 11-miyembrong prosecution panel na hahawak sa impeachment trial laban kay Vice President Sara Duterte sa Senado.
Kabilang sa prosecution team ang mga mambabatas na abogado at kilalang personalidad sa larangan ng batas mula sa majority at minority bloc ng Kamara.
Kabilang sa mga napiling prosecutor sina Mamamayang Liberal Party-list Representative Leila de Lima, Akbayan Party-list Representative Chel Diokno, House Justice Committee Chairperson Jinky Bitrics Luistro, Manila Third District Representative Joel Chua, at dating Dinagat Islands Representative Kaka Bag-ao.
Kasama rin sa panel sina Representatives Terry Ridon, Ysabel Zamora, Lordan Suan, Jonathan Keith Flores, Lorenz Defensor, at Rodge Gutierrez.
Ang prosecution panel ang maghahain ng Articles of Impeachment at mga ebidensya laban sa Bise Presidente sa oras na magsimula ang impeachment trial sa Senado.
Matatandaang inaprubahan ng Kamara ang impeachment complaint laban kay Duterte sa botong 257 pabor, 25 tutol, at siyam na abstention.
Kabilang sa mga paratang laban sa Bise Presidente ang umano’y maling paggamit ng mahigit animnaraang milyong pisong confidential funds, unexplained wealth, bribery, at pagbabanta umano kina Pangulong Ferdinand Marcos Jr., First Lady Liza Araneta-Marcos, at dating Speaker Martin Romualdez.
Nag-ugat ang impeachment case sa serye ng pagdinig ng House Committee on Justice kung saan nagkaroon ng probable cause upang ituloy ang kaso sa Senado.
Inaasahang magsisilbing impeachment court ang Senado sa mga susunod na araw para dinggin ang reklamo laban sa Bise Presidente.
