1,481 total views
Nanindigan ang grassroots coalition na Dapat Isa Lang Movement (D1L) sa pagsusulong ng isang tunay na Anti-Political Dynasty Law sa pamamagitan ng people’s initiative sa kabila ng pag-apruba ng House Bill 8389 na binatikos ng mga kritiko bilang isang “pro-dynasty” na panukala.
Ayon sa D1L, lalo lamang pinagtibay ng pagpasa ng naturang panukala ang pangangailangan para sa isang tunay na Anti-Political Dynasty Law na isang batas na tunay na maglilimita sa kapangyarihan ng mga pamilyang politikal at magbibigay ng mas malawak na pagkakataon sa mamamayan na makilahok sa pamamahala.
“This pro-dynasty bill is exactly why we wish to pass a genuine anti-political dynasty law through people’s initiative: we deserve a better law that is for the people, not dynasties,” Bahagi ng pahayag ni D1L Spokesperson Atty. Carlo Africa.
Sa ilalim ng panukalang isinusulong ng Dapat Isa Lang Movement (D1L), papayagan lamang ang bawat pamilyang politikal na humawak o tumakbo sa isang pambansang posisyon at isang lokal na posisyon.
Ipinagbabawal din nito ang sabayang pagtakbo ng mga kamag-anak hanggang ikaapat na antas ng pagkakamag-anak at pag-aasawa, gayundin ang pagpapalitan o pagsasalin ng puwesto sa loob ng pamilya.
Naniniwala naman si D1L Co-convener Atty. Alex Lacson na hindi kataka-takang magpasa ng isang mahinang anti-dynasty measure ang isang Kongreso na binubuo rin ng maraming mambabatas na nagmula sa pamilyang politikal.
“Passing a weak pro-dynasty House Bill is an obvious move for a dynasty-filled Congress. Dynasties will benefit from House Bill 8389, not us ordinary Filipinos–huwag tayo magpabudol dito!” Ayon kay Lacson.
Samantala tiniyak naman ng Dapat Isa Lang Movement (D1L) ang patuloy na pagsusumikap na mangalap ng mga lagda sa iba’t ibang bahagi ng bansa upang maisulong ang isang referendum para sa pagpapatibay ng kanilang panukalang Anti-Political Dynasty Law na tunay na tatapos sa dinastiya sa pulitika sa Pilipinas.
Nanawagan din D1L sa publiko na makiisa sa kampanya upang maisulong ang tunay repormang magpapalakas sa demokrasya at maglilimita sa paghahari ng mga dinastiyang politikal sa bansa.
