4,701 total views
Binuksan na ng Catholic Educational Association of the Philippines (CEAP) ang nominasyon para sa 2026 Catholic School Heroes Award bilang pagkilala sa mga indibidwal na nagsasabuhay ng misyon at mga pagpapahalaga ng edukasyong Katoliko sa bansa.
Ayon sa CEAP, layunin ng parangal na kilalanin hindi lamang ang mga administrador at pinuno ng paaralan kundi maging ang mga guro, non-teaching personnel, at mga mag-aaral na sa pamamagitan ng kanilang tapat na paglilingkod, malasakit, dedikasyon, at makabuluhang ambag ay nagpapatibay sa buhay at misyon ng mga paaralang Katoliko.
Binigyang-diin ng samahan na ang mga “Catholic school heroes” ay matatagpuan sa iba’t ibang antas ng komunidad ng paaralan at kadalasang gumagawa ng mga tahimik ngunit mahalagang paglilingkod na nag-iiwan ng positibong epekto sa kanilang kapwa at institusyon.
“Catholic school heroes are found not only among administrators and school leaders, but also among teachers, non-teaching personnel, and students whose quiet yet meaningful contributions strengthen the life and mission of Catholic schools every day,” Ayon sa CEAP.
Maaaring i-download, sagutan, at ipasa ng mga nagnanais magpasa ng nominasyon ang mga kinakailangang form at alituntunin sa pamamagitan ng opisyal na email ng CEAP.
Bahagi ang Catholic School Heroes Award ng patuloy na pagsisikap ng CEAP na kilalanin at parangalan ang mga indibidwal na nagsisilbing inspirasyon sa pagsusulong ng kalidad na edukasyon, Kristiyanong paghubog, at paglilingkod sa komunidad sa mga paaralang Katoliko sa buong bansa.
