4,461 total reads
Nanawagan si Marbel Bishop Cerilo Casicas ng higit na kalinawan, pananagutan, at malawakang konsultasyon kaugnay ng mga usapin at panukalang may kinalaman sa pamamahala ng South Cotabato II Electric Cooperative (SOCOTECO II).
Sa inilabas na pahayag ng Diocese of Marbel, binigyang-diin ni Bishop Casicas na hindi dapat ituring na karaniwang negosyo ang suplay ng kuryente sapagkat ito ay mahalaga sa kapakanan ng mga pamilya at sa patuloy na operasyon ng mga institusyon at komunidad.
“Electricity is not merely a business matter. It is a vital social service that affects homes, schools, hospitals, places of worship, livelihoods, and the future of our communities. Thus, decisions affecting South Cotabato II Electric Cooperative (SOCOTECO II) must always be guided by truth, transparency, justice, and concern for the common good,” ayon kay Bishop Casicas.
Ayon sa obispo, maraming miyembro at consumer-owners ng SOCOTECO II ang nagpahayag ng pangamba hinggil sa kakulangan ng sapat na impormasyon, pagiging bukas, at konsultasyon kaugnay ng mga desisyong maaaring makaapekto sa kinabukasan ng kooperatiba.
Iginiit ni Bishop Casicas na hindi dapat balewalain ang mga naturang pangamba sapagkat sumasalamin ito sa lehitimong hangarin ng mga miyembro na mapangalagaan ang kooperatibang kanilang pag-aari at magkaroon ng makabuluhang pakikilahok sa mga usaping may direktang epekto sa kanilang kapakanan.
Mariin ding kinondena ng Diocese of Marbel ang anumang mga pagpupulong na isinasagawa nang walang sapat na pagpapabatid sa publiko, gayundin ang mga manipulasyon, impluwensiya ng mga makapangyarihang personalidad, at mga prosesong hindi nagbibigay ng pagkakataon sa wastong konsultasyon at pakikilahok ng mga miyembro.
“Questionable evaluation procedures that lead to the acceptance or rejection of proposals without clear, transparent, and accountable standards undermine public trust and raise serious concerns on whether decisions are truly being made for the common good,” pahayag ni Bishop Casicas.
Bagama’t kinikilala ng simbahan ang pangangailangan ng mga hakbang na magpapahusay sa serbisyo at pamamahala ng kooperatiba, mariin nitong tinututulan ang may kundisyong pag-apruba ng Board of Directors ng SOCOTECO II sa panukalang Joint Venture Agreement sa IGNITE Power.
Iginiit pa ni Bishop Casicas na ang naturang hakbang ay pabor lamang sa iilang interes habang hindi nabibigyan ng sapat na pagpapahalaga ang saloobin ng nakararaming miyembro ng kooperatiba.
Dahil dito, nanawagan ang Diocese of Marbel ng higit na pagiging bukas, pananagutan, at malawakang konsultasyon upang matiyak ang pakikilahok ng mga miyembro ng SOCOTECO II sa mga usaping may kinalaman sa kinabukasan ng kooperatiba.
Hinimok din ng obispo ang publiko na manatiling mapagmatyag, mapanuri, mapayapa, at patuloy na manalangin sa gitna ng nagpapatuloy na mga usapin sa kinabukasan ng kooperatiba.
“Let us seek verified facts, avoid misinformation and personal attacks, and engage in respectful dialogue for the good of all. May truth guides every decision. May transparency restore trust. May wisdom and integrity prevail among all leaders and stakeholders,” saad ni Bishop Casicas.
