1,220 total views
Mga Kapanalig, nagtapos kahapon ang taunang 18-day campaign to end violence against women (o VAW) sa ating bansa. Ginugunita ito tuwing Nobyembre 25 hanggang Disyembre 12 upang iangat ang kamalayan ng mga Pilipino tungkol sa karahasang pinagdaraanan ng mga babae at upang paigtingin ang mga pagtuldok dito. Sa taong ito, layunin ng kampanyang itaas ang kaalaman ng marami sa Republic Act No. 11313 o ang Safe Spaces Act, o mas kilala bilang “Bawal ang Bastos Law”, na isinabatas noong 2019. Pinagtitibay ng batas na ito ang kaligtasan ng bawat isa, lalo na ng kababaihan sa mga pampublikong lugar at maging sa cyberspace.
Tinataya ng World Health Organization na isa sa tatlong babae sa buong mundo ay nakaranas na ng pisikal at sekswal na karahasan sa kanilang tanang buhay. Dito sa Pilipinas, naitala sa 2017 National Demographic Health Survey na isa sa apat na Pilipina, edad 14 hanggang 59, ang nakaranas na ng pisikal, emosyonal, at sekswal na karahasan mula sa kanilang asawa o kinakasama. Ngayong panahon ng pandemya o mula noong Marso 2020 hanggang Agosto ngayong taon, halos 9,000 kaso ng VAW ang naiulat ng PNP Women Child and Protection Center.
Sa patuloy na pananalasa ng COVID-19 sa maraming bansa at pagkakakulong ng mga tao sa loob ng mga tahanan, tumindi rin ang mga kaso ng karahasan laban sa kababaihan, lalo na sa mga batang babae, sa cyberspace. Ayon sa 2020 State of the World’s Girls, kalahati ng 14,000 batang babae mula sa 31 bansa na sumagot sa survey ay nakaranas ng pang-aabuso online. Nasa 24% sa kanila ang nagsabing hindi ligtas ang pakiramdam, 42% ang nawalan ng self-esteem o kumpiyansa sa sarili, 42% ang nakaranas ng emotional at mental stress, at 18% ang nagkaproblema sa pag-aaral. Ilan sa mga sinasabing pangunahing dahilan ng pang-aabuso ay dahil bata at babae sila, miyembro sila ng mga minoryang grupo at ng LGBTQIA+ community, bukás silang nagsasalita tungkol sa pulitika, o kaya ay mga persons o children with disability. Ang mga platforms kung saan sila pinakamadalas makaranas ng pang-aabuso ay Facebook at Instagram. Ang mga karaniwang porma ng pang-abuso ay pangmamaliit sa kanilang opinyon, pagbabanta ng karahasan, at pag-atake sa pamamagitan ng pagpapakalat ng kanilang malalaswang litrato.
Mariing kinukundena ng Santa Iglesia ang anumang porma ng karahasan at pang-aabuso laban sa kababaihan o kanino man. Malinaw sa mga panlipunang turo ng Simbahang ang bawat isa, anuman ang kanilang kasarian, ay may halaga at dignidad. Lahat ay nilikang kawangis ng Maykapal. Ang ating mga pagkakaiba sa kasarian, estado sa lipunan, maging relihiyon, ay pagkakataon upang magtulungan at sama-samang itaguyod ang isang mundong mas makatao at makatarungan. Sa halip na maging dahilan ng pagkakanya-kanya o pagkontrol sa isa’t isa batay sa kung sino ang itinuturing na mas makapangyarihan, ang ating mga pagkakaiba ay isang imbitasyong dagdagan ang lakas at punan ang kahinaan ng isa’t isa.
Para kay Pope Francis, ang karahasan at pang-aabuso laban sa kababihan ay isang porma ng kaduwagan.[4] Dagdag pa niya, ang patuloy na pang-aabuso sa mga babae ay kababaan ng sangkatauhan. Kaya naman maituturing na kawalan ng katarungan ang karahasan laban sa kababaihan. Kinakailangan itong mahinto sa loob ng mga tahanan, sa kalye, at maging sa cyberspace.
Mga Kapanalig, binibigyang diin sa Galacia 3:28: “Wala nang pagkakaiba ang Hudyo at Griyego, ang alipin at malaya, ang lalaki at babae; kayong lahat ay iisa na dahil sa inyong pakikipag-isa kay Hesus.” Hindi nagkatawang-tao si Hesus at inialay ang kanyang sarili para sa iilan. Ang buhay at kamatayan ni Hesus ay para sa lahat, walang pinipiling kasarian. Bilang mga tagasunod ni Hesus, nawa’y sama-samang nating itaguyod ang dignidad ng lahat.
