49,697 total reads
Itinatakda ng Diyosesis ng Malolos ang sabayang pagdarasal ng “Panawagan para sa Pamamayani ng Awa at Ikapagbabago ng Bayan” o “National Cry for Mercy and Renewal” sa lahat ng Misa tuwing Linggo ngayong Oktubre at Nobyembre 2025.
Ito ang tugon ng diyosesis sa paanyaya ng Catholic Bishops’ Conference of the Philippines (CBCP), para sa sama-samang pananalangin ng sambayanan sa isang mapanagutan, matapat, at mabuting pamamahala sa bansa.
Ayon sa pamunuan ng Diyosesis ng Malolos, darasalin ang naturang panalangin kapalit ng Panalangin ng Bayan bilang konkretong tugon ng mga mananampalataya sa panawagan ng Simbahan na humingi ng awa ng Diyos para sa bayan at sa muling pagbangon ng sambayanan mula sa mga kasalukuyang suliranin.
“Bilang tugon sa paanyaya ng Catholic Bishops Conference of the Philippines (CBCP), itinatakda sa Diyosesis ng Malolos ngayong Buwan ng Oktubre at Nobyembre 2025 ang pagdarasal ng “Panawagan para sa Pamamayani ng Awa at Ikapagbabago ng Bayan” o ang “National Cry for Mercy and Renewal” sa mga Misa ng Linggo (Sunday Masses). Darasalin ito kapalit ng Panalangin ng Bayan.” Bahagi ng pahayag ng Diyosesis ng Malolos.
Layunin ng gawain na pag-isahin ang sambayanang Katoliko sa isang pambansang panalangin ng pagsisisi, awa, at pagbabagong-loob, lalo na sa gitna ng mga kalamidad, katiwalian, at kawalan ng katarungan sa lipunan.
Sa pamamagitan ng sabayang pananalangin, hinahangad ng Simbahan na muling pag-alabin ang pananampalataya, pag-asa, at pagmamahalan ng sambayanang Pilipino upang makamit ang tunay na katarungan at kapayapaan na nagmumula sa Diyos.
Ang Diyosesis ng Malolos ay binubuo ng may 120-parokya mula sa buong probinsya ng Bulacan at lungsod ng Valenzuela.
