494 total views
Ibigay ang tamang benepisyong pang-kalusugan para sa mga guro.
Ito ang hamon ng Teachers’ Dignity Coalition (TDC) sa Department of Education (DepEd) sa hindi pagkaloob ng karampatang serbisyong medikal para sa mga guro sa nakalaipas na 51 taon.
Ayon kay TDC Chairperson Benjo Basas, isa sa pangunahing bagay na dapat bigyang prayoridad ng pamahalaan ay ang pagtiyak sa kalusugan ng mga guro sapagkat dito nakasalalay ang kanilang pagtuturo at pagganap sa mga responsibilidad sa loob ng paaralan.
“In order for us to perform our duties well, kinakailangan namin na nasa prime condition ang aming kalusugan kasi kung maysakit si teacher maaari niyang mahawa yung kanyang mga estudyante at hindi s’ya makakpagturo ng maayos. This is government obligation specifically the DepED is duty-bound to provide the provisions of the law kaya yan yung challnge namin sa kanila.” panawagan ni Basas.
Nakasaad sa 1966 Magna Carta for Public School Teachers na tungkulin ng pamahalaan na pangalagaan ang kalugusan ng mga guro sa pamamagitan ng pagbibigay ng libreng annual physical examnination at pagsagot sa medical treatment o hospitalization kung sakaling kailanganin ito.
Ngunit inihayag ni Basas na hindi na ito naisasakatuparan dahil hindi napopondohan ng gobyerno.
Kaugnay nito ay umaasa si Jennifer De Jesus, guro sa San Vicente Elementary School, San Pedro Laguna na mayroong chronic kidney at kasalukuyang sumasailalim sa hemodialysis na maaaskyunan ng DepEd ang kanilang panawagan at masuportahan ang mga tulad niyang guro na walang kakayahang makapagpagamot.
“Hindi namin kaya ishoulder lahat ng mga gastos kasi kahit sumusweldo ka kulang yun. Kumbaga yung katiting na sweldo kaysa sa pamilya mapunta sa dialysis pa. Kaya kahit hirap na hirap na ko, pumapasok pa rin ako at di pa rin ako nagrersign kasi sabi nga ng doktor ko ‘kapag ikaw nagresign saan ka kukuha ng mga finances mo?,” pagbabahagi ni De Jesus.
Patuloy namang nakikipag-ugnay sa Department of Education ang grupo upang mabigyan ng mas mataas pondo ang mga paaralan at makuha ng mga guro ang karampatang benepisyon kaugnay sa usaping kalusugan.
Sa datos, umabot na sa mahigit 700-libo ang mga public school teachers sa bansa.
Kasabay ng pagkilala sa pagtuturo bilang natatanging propesyon, kinondena ng Kanyang Kabanalan Francisco ang maliit at hindi sapat na sweldo na natatanggap ng mga ito bilang kabayaran sa kanilang pagpupunyagi at pagsasakripisyo.
