433 total reads
5th Sunday of Lent Cycle C
Is 43:16-21 Phil 3:8-14 Jn 8:1-11
Ngayong Linggo tinatakpan na ang mga larawan at mga estatwa sa simbahan. Sa pamamagitan ng simpleng gawaing itong sinasabi sa atin ng simbahan na huwag na muna ninyong pansinin ang mga pangkaraniwang mga bagay na nakikita ninyo sa simbahan. May bagong gagawin ang Diyos sa atin. Abangan natin ang bagong bagay na ito na dadalhin ng kanyang pagpapakasakit at kamatayan. Let us use our imagination at maging handa tayo sa mga bagong bagay na gagawin ng Diyos.
Sinabi ng Diyos sa pamamagitan ni propeta Isaias: “Huwag na ninyong alalahanin ang mga pangyayari ng nakaraan. Gagawa ako ng mga bagong bagay, mga bago na hindi ninyo inaasahan tulad ng bagong daan sa disyerto, tulad ng magkakaroon ng tubig sa mga lupang tigang, tulad ng mga hayop na maiilap tulad ng jackals at ostriches na sasamba sa akin.” Hindi ba sinabi din ito ng Diyos sa Aklat ng Pahayag: “I will make all things new. There will be a new heaven and a new earth”? Mawawala na ang dating mundo at ang dating langit. Papanibaguhin ng Diyos ang lahat.
Paano ito mangyayari? Ang kanyang kamatayan ay tanda ng kamatayan ng mga dating bagay, ang kamatayan ng kasamaan. Ang kanyang muling pagkabuhay ay ang pagdating ng bagong kaayusan na gagawin ni Jesus. Ang muling pagkabuhay ni Jesus ay ang simula ng mga bagong bagay na gagawin ng Diyos.
Ang bagong bagay na ito ay naranasan ng babae sa ating ebanghelyo. Nahuli siya sa kanyang pangangalunya. Maaaring ito ay matagal na niyang ginagawa. Alam niya at alam ng bawat Hudyo na ang parusa dito ay kamatayan. Pero hindi siya makaalis sa kanyang dating gawain hanggang nahuli siya. Dinala ang babaeng ito kay Jesus. Ginamit siya bilang isang pain. Ano daw ang gagawin sa kanya? Kung sasabihin ni Jesus na pakawalan siya, kasi alam nila na maawain siya, masasabi nila na hindi siya sumusunod sa Batas ni Moises na nagtakdang dapat batuhin ang nangangalunya hanggang mamatay. Kung sasabihin ni Jesus na ipataw ang kamatayan sa kanya, hindi na siya mahabagin at isusumbong nila si Jesus sa mga Romano na nagtakdang sila lang ang makahahatol ng kamatayan. Nakulong ang mga tao sa pananaw na makasalanan ang babae at dapat parusahan. Iba ang pananaw ni Jesus. Para kay Jesus bago tayo tumingin sa iba tingnan muna natin ang ating sarili. Bago tayo manghusga sa iba, suriin muna natin ang ating buhay.
Kaya sinabi niya na ang walang kasalanan sa kanila ang mauna na humagis ng bato. Mabuti naman at honest ang mga tao. Ang attention nila ay nawala na sa babae kundi bumaling sa sarili nila. Tiningnan ang kanilang sarili at isa-isa silang umalis. Wala sa kanila ang may karapatang humagis ng bato kasi silang lahat ay may kasalanan din. Ang pinaka-climax ng kuwento ay noong si Jesus na lang at ang babae ang naiwan. Si Jesus ay walang kasalanan. Siya ang maaaring humagis ng bato. Pero napakaganda ng sinabi ni Jesus. “Ako rin, hindi kita paparusahan. Umalis ka na at huwag ka nang magkasala.” Hindi binalewala ni Jesus ang kanyang kasalanan. Alam niya na may kasalanan siya, pero ang tagumpay sa kasalanan ay hindi ang pagpatay sa makasalanan kundi ang pagbabago sa nagkasala. Siguradong nagbago ang babae. Nag-aantay na lang siya ng unang bato na tumama sa kanyang ulo o sa kanyang dibdib, ngunit ngayon malaya na siya, at buhay pa!
Ang pananaw na ang tagumpay sa kasamaan ay ang pag-eliminate ng masasama ay nasa kultura pa rin natin, kahit na 500 years na tayong Kristiyano. Kaya tahimik lang tayo habang pinapatay ang mga suspected na drug addict o ang mga tinuturing na communista. Addict kasi eh! Communista kasi eh! O ngayon, ilang libo na ang pinatay ng extra-judicial killings at ilang libo na rin ang nailigpit dahil sa red-tagging, nabawasan ba ang mga drug problem ng bansa? Nawala ba ang mga progresibong grupo? Bigo ang drug war! Bigo rin ang red-tagging! May mga tao pa rin na naniniwala na ang solusyon sa mga karumaldumal na criminal ay ang pagbitay sa kanila. Kaya gusto pang isulong ang death penalty. Kailan tayo matututo sa aral ni Jesus na pagbabago ng mga criminal, at na ang kailangan ng mga drugs addicts ay rehabilitation at hindi pagpapatay! Ito ang bagong bagay na dinadala ni Jesus.
Naranasan din ito ni San Pablo. Napakasama niya. Hindi lang siya hindi naniniwala sa katuruan ng mga apostol na si Jesus ay ang Kristo. Pinanghuhuli pa niya ang mga Kristiyano at pinapakulong. Sumang-ayon pa siya sa pagpatay kay Esteban, ang unang martir ng simbahan. Pero hindi siya tinumba ng Diyos. Oo, natumba siya sa lupa noong naranasan niya si Jesus sa daan patungong Damasco. Natumba siya pero binangon uli siya. Binago siya! Kaya ngayon nasabi niya sa ating ikalawang pagbasa na tinalikdan na niya ang pinagmamalaki niya noon, ang kanyang kaalaman sa batas ni Moises at ang pamumuhay niya bilang isang magaling na Pariseo. Itinuring na niya itong walang kuwenta, na tulad na lang ng basura, na ngayon nakilala na niya si Kristo. Nagbagong tao na siya! Siya pa ang naging napakagaling na tagapagpahayag ni Kristo. Naranasan niya ang pagbabago sa kanya, at naging masigasig siyang apostol.
Nalalapit na ang Mahal na Araw. Let us be ready for the new things that God will bring about. Kaya huwag na muna nating pansinin ang mga dating bagay na nakikita natin at ginagawa natin. Hayaan nating baguhin tayo ng Diyos. Huwag tayong mawalan ng pag-asa sa pagpapanibago.
Ngayong palapit na ang halalan marami sa kababayan natin ay nakatali pa sa nakaraan, sa dating gawi. Nasa paniniwala pa na …. “Ay pare-pareho naman ang mga kandidatong iyan. Wala nang mangyayaring bago sa bansa natin. Ganyan talaga ang politika.” Huwag po tayong magpatali sa nakaraan. Maaari pang magbago. Lumabas tayo. Ikampanya ang mabubuting tao. Kantiyawan ang mga namimigay ng pera. Talikdan na ang mga political dynasties at mga makalumang mga politiko. Bantayan ang Comelec upang hindi mandaya. Tayo ay kumilos upang dumating ang pagbabago na dadalhin ng Diyos. Iyan ang mensahe ng muling pagkabuhay. May bago na darating sa ating sarili at sa ating bansa. Hangarin natin ang bagong kaayusan at kumilos na, upang ito ang mangyari!
