280 total views
Pinaalalahanan ni San Pablo Bishop Buenaventura Famadico ang publiko na huwag makampante sa kabila ng patuloy na pagbaba ng kaso ng COVID-19 sa bansa.
Ayon kay Bishop Famadico na nararapat lamang na ipagpasalamat sa Diyos na unti-unti nang bumabalik sa dati ang sitwasyon ng lipunan ngayong kaunti na lamang ang bilang ng mga nahahawaan ng virus.
Ngunit babala ng Obispo na kaakibat pa rin nito ang tungkulin ng bawat isa na huwag na muling hayaang lumala ang sitwasyon at huwag ring hintaying makaapekto pa ulit ito sa buhay ng tao.
“Tayo ay magpasalamat sa Diyos at bumababa na ang kaso ng COVID-19. Ngunit, huwag nating hayaan na tumaas ulit ang mga bilang ng kaso nito at maapektuhan ang buhay ng bawat isa,” pahayag ni Bishop Famadico sa Radio Veritas.
Iginiit ni Bishop Famadico na dapat pa ring panatilihin ang pag-iingat at patuloy na sundin ang pagsusuot ng face mask at social distancing upang patuloy na maging ligtas sa banta ng COVID-19.
“Panatilihin pa rin natin ang pagsunod sa minimum health protocols,” dagdag ng Obispo.
Batay sa huling tala ng Department of Health, aabot sa 2,227 ang panibagong kaso ng COVID-19 sa bansa, na nagresulta naman sa 21,101 aktibong kaso.
Umabot naman sa 3,152 ang panibagong bilang ng mga gumaling habang nasa 175 naman ang mga nasawi.
Samantala, ayon naman sa National Task Force Against COVID-19, nasa higit 73-milyon na ang bilang ng mga nakatanggap ng COVID-19 vaccine.
Sa nasabing bilang, nasa halos 33-milyon na ang kumpleto na sa bakuna laban sa virus habang nasa 40-milyon naman ang nakatanggap pa lamang ng unang dose at 6,000-health workers naman ang nakatanggap ng additional dose mula sa single-dose na Johnson & Johnson vaccine.
