34,225 total reads
Hinamon ni Puerto Princesa Bishop Socrates Mesiona, MSP, ang mga layko, pari, at seminarista na huwag mawalan ng pag-asa sa kinabukasan ng Pilipinas at simulan sa sarili ang pagbabagong ninanais para sa bansa.
Ito ang mensahe ng obispo sa paglunsad ng Katipunan Formation Program ng Apostolic Vicariate of Puerto Princesa (AVPP) noong August 11 sa San Ezekiel Moreno Spirituality and Development Center sa San Jose, Puerto Princesa City.
Binigyang-diin ni Bishop Mesiona na posible ang pagbabago sa bansa ngunit kailangan itong magsimula sa personal na pagbabago at responsableng pagkilos ng bawat mamamayan.
“Change is possible. It has to start with ourselves,” ayon kay Bishop Mesiona.
Aniya, sa kabila ng mga mabibigat na suliraning kinakaharap ng bayan ay mahalagang manatiling positibo ang mamamayan sa pagkamit ng pag-unlad at pagbabago.
“Napakahalaga na hindi tayo mawalan ng pag-asa. May mabubuting tao pa rin sa gobyerno. Hindi naman tayo nauubusan ng mabubuting tao,” aniya.
Inihalimbawa ni Bishop Mesiona ang pag-unlad ng mga bansang tulad ng South Korea, Malaysia, Taiwan, at Vietnam, na aniya ay maaaring magdulot ng pag-aalala at pagtatanong sa mga Pilipino kung saan patungo ang bansa.
Gayunman, iginiit ng pastol na hindi dapat mauwi sa pagkadismaya ang ganitong paghahambing, kundi magsilbing hamon upang kumilos ang bawat isa para sa pagbabago mula sa sarili, pamilya, komunidad at parokya hanggang sa buong bayan.
Tinalakay sa formation program ang mga pangunahing suliraning panlipunan tulad ng korapsyon, kahirapan, kriminalidad, kasinungalingan, panlilinlang, at pagtataksil, gamit ang mga pananaw mula sa kasaysayan at Bibliya.
Itinampok din ang 5Ps framework: Prayer o Panalangin, Protest o Pagtutol, Hold Accountable o Panagutin, Remove o Pagtabas, at Hope o Pag-asa, bilang konkretong gabay sa pagtugon ng mga pamayanan sa mga suliraning panlipunan.
Aabot sa 265 ang lumahok sa formation program na kinabibilangan ng mga pari, parish lay leaders, kinatawan ng mga lay organization at seminarista, na magiging katuwang ng CBCP sa pagsulong ng pagiging mabuting mamamayan at pakikilahok sa mga usaping panlipunan na nakaugat sa pananampalatayang Kristiyano.
Pinangunahan ni Madeliene Ibe at ng kanyang grupo mula sa Kaya Natin Movement ang paghuhubog, isang organisasyong nagsusulong ng good governance, ethical leadership, at social accountability.
Lumagda ang mga kalahok, kasama si Bishop Mesiona, sa “Paninindigan sa Katipunan,” na naglalayong patibayin ang kanilang pangako na labanan ang korapsyon, kriminalidad, kahirapan, kasinungalingan at pagtataksil.
Sa pamamagitan ng programa, layunin ng AVPP na hubugin ang mga mananampalataya bilang mga responsableng mamamayan at tagapagtaguyod ng pagbabago na handang isabuhay ang integridad, pananagutan, katarungan at pag-asa sa paglilingkod sa Diyos at bayan.
(With reports Katya Santos)
