856 total reads
Hinikayat ng opisyal ng health ministry ng Catholic Bishops’ Conference of the Philippines ang mananampalataya na isabuhay ang mga halimbawa ni Padre Pio ng Pietrelcina lalo na sa karanasan ng bawat isa sa krisis na dulot ng pandemya.
Sa pagninilay ni Camillan priest Reverend Father Rodolfo Vicente Cancino, MI, Executive Secretary ng CBCP-Episcopal Commission on Health Care sa kapistahan ng santo, umaasa itong hindi mahihinto sa pagiging deboto lamang ni Padre Pio kundi mas mahalagang tularan ang pamumuhay ng santo na ayon sa kalooban ng Diyos.
“Nawa ngayong kapistahan ni Padre Pio, hindi lang ito debosyon kundi isabuhay din natin [ang kanyang mga gawi]; hilingin kay Padre Pio na tulungan tayong isabuhay ang katotohanan at ang totoong tiwala sa Diyos,” bahagi ng pagninilay ni Fr. Cancino.
Pagbabahagi ng pari tulad ni Padre Pio na hinamon ang buhay, nagkasakit, itinatwa at hindi pinaniniwalaan ay nanatiling kumakapit at naninindigan sa katotohanang dulot ng Panginoon sa kanyang buhay.
Sinabi ni Father Cancino na ito rin ang hamon sa bawat isa lalo ngayong panahon ng corona virus pandemic kung saan sinusubok ang katatagan ng pananalig sa Diyos.
Umaasa ang Pari na tulad ni Padre Pio ay piliin ng tao ang manindigan sa kaligtasang dala ni Kristo sa sanlibutan.
Binigyang diin ng kamilyanong pari na ang salita ng Diyos ang nagpapatatag sa kalooban at sa buong katauhan at pinakamabisang sandata laban sa anumang hamon sa buhay.
Ikinalungkot naman ni Fr. Cancino na sa kabila ng maraming deboto ni Padre Pio ay kakaunti lamang ang nagsasabuhay ng kanyang mga halimbawa.
Ngayong taon ay ginugunita ng simbahang katolika ang ika – 52 anibersaryo ng kamatayan ng Santo kung saan noong 2018 ay dinala sa bansa ang ‘incorrupt heart relic’ ni Padre Pio mula sa San Giovanni Rotondo sa Italya at binisita ang ilang simbahan sa Pilipinas kabilang ang Manila Cathedral, Cebu Metropolitan Cathedral, San Pedro Cathedral sa Davao City at matagal na inilagak sa National Shrine of Padre Pio sa Santo Tomas Batangas.
Hinahamon ni Fr. Cancino ang mamamayan na ipahayag ang salita ng Diyos nang may kababaang loob tulad ni Padre Pio.
“Tulad ni Padre Pio humawak tayo sa Salita ng Diyos, ipahayag natin ito sa lahat ng dako ng mundo, ipahayag natin ito sa ating pamumuhay sa araw-araw ; simple, ordinaryo subalit nagluluningning na katotohanan at tiwala sa Diyos,” dagdag ng pari.
