215,042 total views
Mga Kapanalig, patuloy ang pagdinig ng House Committee on Justice para alamin ang probable cause para ma-impeach si Vice President Sara Duterte. Noong isang linggo, muling ibinahagi ni dating Senador Antonio Trillanes ang akusasyon niya laban sa pamilya Duterte na may kaugnayan sila sa sindikato ng droga.
Ano kaya ang nararamdaman ng libu-libong naulila ng mga biktima ng madugong giyera kontra droga ni dating Pangulong Rodrigo Duterte sa akusasyong ito?
Ayon kay Trillanes, mahigit 181 milyong piso ang ibinigay sa pamilya Duterte ng diumano’y drug lord na si Samuel Uy, isang negosyante mula sa Davao. Sa halagang ito, 22 milyong piso ang ibinigay kay VP Sara, halos 52 milyong piso kay Davao City Mayor Sebastian Duterte, halos 39 milyong piso kay Davao City First District Representative Paolo Duterte, at 53 milyong piso kay Kitty Duterte at sa kanyang ina. Labinlimang milyong piso naman ang ibinigay umano kay dating Pangulong Duterte. Isa si Samuel Uy sa mga top campaign donors ni Pangulong Duterte noong tumakbo ito sa pagkapresidente.
Dagdag ni Trillanes, may joint bank accounts sina VP Sara at ang kanyang ama, kung saan halos dalawang bilyong piso ang pumasok na pera mula 2003 hanggang 2016. Gayundin, may mahigit 110 milyong pisong transaksyon sa joint account naman nina VP Sara at asawang si Mans Carpio. Lahat ng ito ay hindi raw idineklara ni VP Sara sa kanyang Statement of Assets, Liabilities, and Net Worth (o SALN). Kung totoo, paglabag ito sa Saligang Batas at tiwala ng taumbayan. Maituturing itong ground for impeachment.
Bilyun-bilyong piso ang pinag-uusapan sa paratang ni Trillanes sa pamilyang Duterte at iniuugnay ang mga ito sa droga, na sentro ng kampanyang binitbit ng administrasyon ng dating pangulo. Sa opisyal na tala ng pamahalaan, nasa anim na libo ang napatay o sadyang pinatay sa mga anti-drug operations ng kapulisan. Pero ayon sa mga human rights groups, nasa tatlumpung libo ang biktima ng giyera kontra droga, kasama ang mga extra judicial killings.
Noong Huwebes lang, kinumpira ng International Criminal Court Pre-Trial Chamber ang tatlong kaso laban kay dating Pangulong Duterte. Ibig sabihin, nakita nilang mayroong substantial grounds upang dinggin ng ICC ang mga pagpatay na iniuugnay sa kanya dahil na rin sa inilunsad niyang giyera kontra droga.
Nakaririmarim ang larawang iginuguhit ng mga pangyayari. Kung mapatutunayan, nakinabang ang pamilya Duterte mula sa maruming pera ng iligal na droga habang kinakatay ang maliliit na taong pinaghihinalaang sangkot sa droga. Dumanak ang dugo ng mahihirap at napuno ng takot ang mga komunidad habang nagpapakasasà sila sa maruming kayamanan. Hindi kaya palabas lang ang giyera kontra droga kung saan naging tiket ang buhay ng maraming Pilipino?
Patuloy ang hamon sa ating mga Kristiyano na alamin at isulong ang katotohanan. Katotohanan ang tunay na magpapalaya sa atin. Kakabit nito ang katarungan o ang pagkakaloob ng nararapat sa bawat tao. Ang katarungan ay pagkilala sa dignidad ng tao, at hindi ito makakamit kung may lamat ang ugnayan natin sa isa’t isa. Panghuli, ang katotohanan at katarungan ay nagmumula sa pag-ibig sa Diyos at sa kapwa. Hinahamon tayo ng pag-ibig na ito na lumabas sa ating mga sarili nang ang katotohanan at katarungan ay lumaganap.
Mga Kapanalig, hindi “dadaloy ang katarungan” na tinutukoy sa Amos 5:24 hangga’t hindi natin nalalaman ang katotohanan sa likod ng akusasyon sa ating mga lider at hangga’t hindi nabibigyan ng hustisya ang mga biktima ng giyera kontra droga. Sikapin nating maging mapagmahal tayong lipunan sa pamamagitan ng paghahanap sa katotohanan at paggawad ng katarungan sa mga pinatay. Tapusin na natin ang palabas ng mga naghahari-harian sa ating bayan.
Sumainyo ang katotohanan.
