44,615 total reads
Ito ang mariing pahayag ni Taytay, Palawan Bishop Broderick Pabillo, Chairman ng Catholic Bishops’ Conference of the Philippines–Episcopal Commission on Stewardship, bilang pagtutol sa mungkahing pagkakaroon ng reporma sa Saligang Batas.
Un ng nanawagan si Deputy Speaker Ronaldo Puno, sa pagsasagawa ng constitutional convention (Con-Con) para repasuhin at ayusin ang 1987 Konstitusyon sa layuning alisin ang mga malabong probisyon at mga kakulangan na nagpapahina sa batas at sa tiwala ng publiko.
Kabilang sa inihalimbawa ng mambabatas ang salitang ‘forthwith’ kaugnay sa usapin ng impeachment complaint laban kay Vice President Sara Duterte, k ung saan nagkaroon ng magkaibang pakahulugan ang dalawang kapulungan ng Kongreso at ilang mga eksperto sa batas.
Ayon kay Bishop Pabillo, hindi sapat na dahilan ang isang maliit na hindi pagkakaunawaan sa interpretasyon ng salita upang buksan muli ang Konstitusyon.
“Actually, maliwanag naman ang forthwith na ‘yun kung talagang gusto nilang gawin. Ang konstitusyon ay isang mahalagang dokumento para sa ating basehan ng lahat ng mga batas at hindi dapat pinaglalaruan ‘yan dahil sa konting hindi pagkakaunawaan,” paliwanag niya.
Iginiit ng Obispo na hindi ang Konstitusyon ang may problema kundi ang pag-unawa at pagsunod ng ilang mambabatas dito.
Nilinaw ng Obispo na maliban sa hindi makatwiran ang dahilan, mabigat din ang magiging gastos at posibleng magamit ang pagbubukas ng Saligang Batas para sa pansariling interes ng mga nasa kapangyarihan.
“Problema lang d’yan, may pera ba ang gobyerno para sa ConCon? Pangalawa, kapag buksan pa ang Constitution, lahat ng kwan sa gobyerno natin ay mabubuksan na rin ano? Kaya maaring ‘yan ay gamitin ng tao para sa pagpapahaba ng termino ng mga nasa Kongreso, ng mga presidente,” ayon sa pahayag ng obispo sa panayam ng Radyo Veritas.
Muling iginiit ni Pabillo na dapat manatiling iginagalang at sinusunod ang Konstitusyon, at huwag basta-bastang baguhin dahil lamang sa maliit na usapin.
Bukod kay Bishop Pabillo, ilan ding mga pinuno ng simbahan ang nagpahayag ng agam-agam sa posibleng reporma sa Konstitusyon sina San Carlos Bishop Gerardo Alminaza, Antipolo Bishop Ruperto Santos at Kidapawan Bishop Jose Colin Bagaforo-chairman ng Caritas Philippines.
Naniniwala naman ang mambabatas na ang Konstitusyon, bilang pangunahing batas ng bansa, ay dapat maging malinaw, matatag, at madaling maunawaan ng hukuman, mambabatas, at mamamayang pinangangalagaan nito.
