17,844 total views
Suportado ng Catholic Educational Association of the Philippines (CEAP) ang pakikipaglaban ng mga katutubo, mangingisda, at mga residente ng Mariahangin Island sa Bugsuk, Balabac, Palawan laban sa sapilitang pagpapaalis sa kanilang lupaing ninuno kaugnay ng planong ecotourism project ng San Miguel Corporation at Bricktree Properties.
Mariing kinokondena ng CEAP ang insidente ng karahasan noong April 4, 2025, kung saan ipinadala ang 80 armadong guwardiya sa isla, na nagdulot ng banta sa seguridad, dignidad, at karapatang pantao ng mamamayan.
Iginiit ng grupo na ang anumang uri ng pananakot, panggigipit, at paglabag sa karapatan ng komunidad ay salungat sa batas at sa katarungang panlipunan ng Simbahan.
“We are deeply concerned by credible reports and testimonies that reveal the unjust displacement and harassment, including restrictions on food and water access and violations of the rights of local communities… These actions are contrary not only to the Philippine Constitution and laws such as the Indigenous Peoples Rights Act, the Comprehensive Agrarian Reform Program Extension with Reforms, and the Fisheries Code but also to international standards on business, human rights, and ecological justice,” ayon sa pahayag ng CEAP.
Bilang mga katolikong lingkod sa larangan ng edukasyon, naninindigan ang CEAP na dapat isabuhay at isulong ang mga prinsipyo ng katuruan ng simbahan sa pamamagitan ng pagkilala sa karapatan ng mga katutubo sa lupaing ninuno; pagsusulong ng kapayapaan at di-marahas na pagkilos; pangangalaga sa kalikasan at pamayanan; at katarungan at tunay na kaunlaran na may pagkilala sa dignidad ng tao.
Pinuri rin ng grupo ang mapayapang pagkilos ng SAMBILOG Balik Bugsuk Movement, sa pamamagitan ng prinsipyong “Alay-Dangal”, na anyo ng marangal at mapayapang paglaban na nakaugat sa katotohanan at pag-ibig.
Nagpahayag din ng suporta ang CEAP sa Jubilee Walk of Farmers, na 60-araw na paglalakbay na nagsimula noong March 13 at magtatagal hanggang May 12, 2025, mula Concepcion, Kabasalan, Zamboanga Sibugay patungong EDSA Shrine at People Power Monument, bilang panawagan para sa lupa, katarungan, at kapayapaan ngayong Taon ng Jubileo.
Panawagan naman ng CEAP sa San Miguel Corporation at sa mga kaugnay na ahensya ng pamahalaan na igalang ang karapatan ng mga taga-Mariahangin at pakinggan ang kanilang tinig.
“Development must be inclusive, ethical, and respectful of human dignity and rights,” giit ng CEAP.
