1,091 total views
Tiniyak ng Roman Catholic Archdiocese of Manila (RCAM) ang pagpapahalaga sa ginagampanang tungkulin ng Social Communications Ministry (Soccom) ng mga simbahan.
Ito ang mensahe ni Father Roy Bellen , pangulo ng Radyo Veritas at RCAM Assistant Cluster Coordinator ng Archdiocesan Commission on Social Communications sa pagtatapos ng taunang 2025 Media Convention – Social Communications Masterclass.
Ayon sa Pari, ito ay dahil sa katangi-tanging paglilingkod ng Soccom sa kanilang mga parokya upang ihayag ang mabuting balita ng Panginoon sa lipunan.
“Siguro po sa ating mga Soccom sa mga parokya po lalo na dito sa Archdiocese of Manila and even po beyond, gaya po ng nabanggit ni Monsignor Regie ngayon pong araw na ito as we have culminated yun pong ating convention ng Media ngayon pong 2025, Hindi man kayo madalas mapasalamatan in public- yung mga Soccom pero alam po ng simbahan, lalo po alam ng Diyos, nakita po ng Diyos yung ministry,” ayon sa panayam ng Radyo Veritas kay Fr.Bellen.
Panalangin ng Pari, nawa sa kabila ng kapaguran sa kanilang pagsisilbi ay mananatiling matatag ang kanilang pananampalataya dahil bukod sa simbahan, ang paglilingkod na ginagawa ng mga Soccom ay para sa Panginoon.
Kasunod ito ng mensaheng panatilihin ang kababawang loob sa puso ng bawat kawani, volunteers at opisyal ng mga Soccom upang higit na pagyamanin ng Panginoon ang kanilang mga kinabibilangang ministry.
“Yung service na inyo pong ginagawa kung kaya po sa ngalan po ng mga kaparian I dare even sa ngalan po ng buong simbahan, maraming maraming salamat po sa inyo mga Soccom and hindi niyo maaring malamangan ang kabaitan po ng Diyos, kung kayo po ay maging mabait, maging mapagbigay po sa Diyos, ang Diyos din po ay pagpapalain po kayo, God Bless po always!,” ayon pa sa mensahe ni Fr.Bellen sa Radyo Veritas.
Ayon sa mga pag-aaral ng private intelligence agency ng CAPSTONE INTEL, dahil sa pandemya, anim sa kada sampung Pilipino ang nanunuod ng livestreaming ng ibat-ibang parokya matapos itong maging isa sa mga mahahalagang gawain ng simbahan noong maranasan ng buong mundo ang COVID-19 Pandemic.
