Hinimok ng pinunong pastol ng Archdiocese of Nueva Caceres ang mananampalataya na palalimin ang debosyon at pananampalataya.
Ito ang mensahe ni Archbishop Rolando Tria Tirona sa paghahanda ng kapistahan ng Mahal na Birhen ng Penafrancia at Divino Rostro sa Setyembre.
Ayon sa Arsobispo tulad ng hamon ni Pope Francis sa Synod on Synodality mahalagang magbuklod ang mananampalataya sa gabay ng Mahal na Birheng Maria upang mas lumago ang simbahan sa pagmimisyon sa nasasakupang kawan.
“During this feast of Penafrancia let us deepen our sense of communion, let us actively participate and let us open our hearts towards a missionary church,” ayon sa mensahe ni Archbishop Tirona.
Paliwanag ng arsobispo dito nakabatay ang tema sa kapistahan na ‘Mary accompanies us in our journey towards a synodal church’ bilang pagpapaigting sa pagsasabuhay ng Arkidiyosesis sa synodality o sama – samang paglalakbay bilang simbahan.
Ayon kay Archbishop Tirona na sa pamamagitan ng dayalogo at pakikipag ugnayan ng simbahan at mananampalataya higit na lumago ang simbahang nagmimisyon tungo sa paghubog ng espiritwalidad ng sangkatauhan.
Binigyang-diin ng Arsobispo na sa tulong ng Mahal na Ina ay mas mahimok ang mananampalataya na tumugon sa tawag ng pagmimisyon.
“The Blessed Mother journeys with us, enlightens us, accompanies us and above all encourages us in this beautiful mission,” dagdag ni Archbishop Tirona.
Ang pista ng Penafrancia ang isa sa malalaking pista sa Pilipinas na dinadayo ng libu-libong deboto sa Bicol region at iba pang bahagi ng Pilipinas.
Sa pinagsamang pahayag ng Arkidiyosesis at lokal na pamahalaan ng Naga City muling pahintulutan ang pagdiriwang ng kapistahan ngayong taon makaraan ang dalawang taong pagpaliban dahil sa COVID-19 pandemic.
Gayunpaman mahigpit na paalala ng simbahan at lokal na pamahalaan na sundin ang mga safety protocols upang makaiwas sa posibilidad na mahawaan ng virus.
Bukod tanging mga kasapi ng Cofradia de San Jose ang maaring bubuhat sa andas ng El Divino Rostro at Mahal na Birhen ng Penafrancia.
Sa mga mananampalatayamg makiisa sa pagdiriwang at prusisyon maaring hintayin sa dadaanan ng ruta ng prusisyon, magsindi ng kandila, maghanda ng puting panyo at mga bulaklak.
Paanyaya ni Archbishop Tirona sa mananampalataya ang pakikiisa sa panalangin at pagsunod sa mga alintuntunin para sa ikatatatagumpay ng mahalagang pagdiriwang.
