6,753 total views
Iginiit ni Pope Leo XIV ang kahalagahan ng katotohanan at pananampalataya kasabay ng patuloy na pagdiriwang ng Pasko ng Muling Pagkabuhay ng Panginoon, sa gitna ng paglaganap ng maling impormasyon sa lipunan.
Sa kanyang pagninilay sa Regina Coeli sa St. Peter’s Square sa Vatican, binigyang-diin ng Santo Papa na nalilihis ang katotohanan dahil sa mga kasinungalingan at iba pang uri ng manipulasyon ng impormasyon.
“This contrast invites us to reflect on the value of Christian witness and the integrity of human communication. Often, the proclamation of truth is obscured by what we today call “fake news” — lies, insinuations, and unfounded accusations,” ayon kay Pope Leo XIV.
Ipinaliwanag ng santo papa na tulad ng nangyari sa muling pagkabuhay ni Hesus, may dalawang magkaibang salaysay na maaaring piliin ng tao, ang katotohanang nagbibigay-buhay, at ang kasinungalingang nagdudulot ng kamatayan.
Kaugnay nito, hinikayat ng punong pastol ang mga mananampalataya na maging matapang sa pagpapahayag ng Mabuting Balita.
Hamon ng Santo Papa sa mananampalataya na huwag matakot na ipahayag ang mabuting balita bilang paanyaya na isabuhay at ipalaganap ang mensahe ng muling pagkabuhay ni Kristo.
Binigyang-diin din ni Pope Leo XIV na sa pamamagitan ni Hesus ang kawalan ng pag-asa dulot ng kamatayan ay tuluyang napawi at ang Pasko ng Pagkabuhay ay nagdudulot ng panibagong pag-asa para sa sangkatauhan.
Inalala rin ni Pope Leo ang mga taong patuloy na nagdurusa sa iba’t ibang bahagi ng mundo, kabilang ang mga biktima ng digmaan, mga inuusig dahil sa pananampalataya, at mga batang napagkakaitan ng edukasyon.
“Dear friends, how important it is that this Gospel reach, above all, those oppressed by the evil that corrupts history and confuses consciences! I think of people afflicted by war, of Christians persecuted for their faith, of children deprived of an education. To proclaim the Paschal mystery of Christ in both word and deed means to give a new voice to hope — a hope otherwise stifled by the hands of the violent. Wherever it is proclaimed, the Good News sheds light upon every shadow, in every age,” ani santo papa.
Giit ng pastol na ang pagpapahayag ng misteryo ng Pasko ng Pagkabuhay ay nagbibigay ng bagong tinig sa pag-asa—lalo na sa gitna ng karahasan at kaguluhan.
Apela ni Pope Leo XIV sa lahat ng mananampalataya na patuloy na manalangin para sa kapayapaan sa buong mundo, kasabay ng pagdiriwang ng Easter Octave.
