30,761 total reads
Pinaigting ng Ateneo de Zamboanga University (AdZU) ang security measures at access control sa Salvador Campus nito bilang paghahanda sa pagbabalik ng face-to-face classes ngayong Setyembre 1, 2026 matapos ang halos dalawang linggong suspensyon ng klase.
Kabilang sa mga ipinatupad na hakbang ang pagdaragdag ng RFID readers at mga CCTV camera sa mahahalagang bahagi ng campus upang mapalakas ang monitoring at mas mahigpit na makontrol ang pagpasok at paglabas ng mga estudyante at iba pang miyembro ng komunidad.
Sumailalim din sa walkthrough at briefing ang University Security Team hinggil sa entry screening, paggamit ng security equipment, bag checks, pamamahala sa prohibited items, gayundin sa behavioral indicators at de-escalation protocols.
Ayon sa AdZU, layunin ng mga hakbang na matiyak ang ligtas at maayos na pagbabalik ng mga estudyante sa in-person instruction.
“Ateneo de Zamboanga University (AdZU) has reinforced its campus safety and security protocols to facilitate a smoother, safer return for students coming back to the Salvador Campus on September 1, 2026… Driven by a tireless adherence to safety, especially as students return to in-person instruction, the University Security Team worked diligently to fortify access points and ensure that all security equipment is fully functional.” Bahagi ng pahayag ng unibersidad.
Ibinahagi rin ng pamunuan ng AdZU ang patuloy na pagsusuri ng unibersidad sa mga security procedures at operational protocols upang maprotektahan ang buong academic community at mapanatili ang campus bilang ligtas na lugar para sa pag-aaral.
“Through continuous review of operational procedures and security protocols, and a steadfast commitment to the community’s well-being, AdZU ensures that the campus remains a sanctuary for learning.” Ayon sa pamunuan ng unibersdad.
Kasabay ng pagbabalik ng face-to-face classes, hinikayat din ng AdZU ang lahat ng miyembro ng komunidad na sundin ang mga security procedures at makipagtulungan sa mga security personnel na nagpapatupad ng mga bagong hakbang kasunod ng naganap na pamamaril sa campus noong Agosto 18, 2026 na ikinasawi ng dalawang indibidwal.
Sa gitna ng patuloy na pagbangon ng komunidad, binigyang-diin ng Ateneo de Zamboanga University (AdZU) ang kahalagahan ng sama-samang pagkilos upang matiyak na ang unibersidad ay mananatiling ligtas na lugar para sa edukasyon at paghubog sa kabataan.
