9,211 total reads
Inihayag ng bagong talagang hepe ng Philippine National Police (PNP) na bahagi ng malawakang anti-drug strategy ni Pangulong Ferdinand Marcos Jr., ang rehabilitasyon ng mga hinihinalang drug addict.
Sa press briefing sa Malacañang, hinimok ni PNP Chief P/Gen. Nicolas Torre III ang mga indibidwal at pamilyang apektado ng droga na boluntaryong lumapit sa pulisya upang magpa-rehabilitate, at tiniyak na handang tumulong ang PNP.
Ayon sa PNP chief, ang rehabilitasyon ay mahalagang hakbang upang matigil ang drug addiction at maiwasan ang pagkakakulong ng mga drug users na handa sa pagbabago.
“Kung gusto ninyong makaiwas sa kaso at makapagbagong-buhay, lumapit kayo sa amin at magpa-rehab. Tutulungan namin kayo,” ayon kay Torre.
Itinuturing ng PNP ang rehabilitasyon bilang mahalagang hakbang ng solusyon sa problema sa droga, ang magkasamang pagpapatupad ng batas at serbisyong pangkalusugan.
Ang pahayag ni Torre ay nagpapakita ng panibagong mukha ng kampanya kontra droga—isang kampanyang hindi lang nakatuon sa paghuli, kundi pati na rin sa pagbibigay ng pag-asa at pagkakataong magbago.
“Hindi ito iyong dating nangyayari na patay ang tao, ang nagrireklamo ay iyong pamilya – hindi ganoon. Ang hinuli mismo, buhay iyan, puwedeng kumuha ng abogado dahil iyan ay kaniyang karapatan dahil kapag inaresto ka, babasahan ka ng Miranda Rights,” ayon pa kay Torre.
Hamon din ni Torre sa mga pulis na maging mas matapang at epektibo sa paglaban sa ilegal na droga habang hinihikayat din ang publiko na magreklamo laban sa mga pulis kung may pang-aabuso.
Taong 2016 sa ilalim ng administrasyon ni dating Pangulong Rodrigo Duterte nang ipatupad ang giyera kontra droga, kung saan tinatayang may higit sa 20 libo ang napaslang ayon sa tala ng mga human rights group.
Sa parehong panahon nang inilunsad ng simbahan ang church-based drug rehabilitation bilang tugon sa malawakang problema ng bansa kaugnay sa illegal na droga.
