277,413 total views
Mga Kapanalig, si Senador Alan Peter Cayetano na ngayon ang bagong Senate President, kapalit ni Senador Vicente “Tito” Sotto III.
Marami sa mga sumuporta sa pag-upo ni Senate President Cayetano ay kilalang kaalyado ni dating Pangulong Rodrigo Duterte at ng kanyang anak na si Vice President Sara Duterte. Naging dahilan pa nga ito para lumabas si Senador Bato dela Rosa matapos ang anim na buwang pag-absent at pagtatago. Ang galing ng timing, hindi ba?
Nagbago ang liderato sa Senado sa gitna ng ikalawang impeachment complaint laban kay VP Sara Duterte. Upang ma-impeach siya, kailangan ng two-thirds vote sa Senado. Pero dahil sa bagong liderato at bagong mayorya, na binubuo ng mga loyal sa pamilya Duterte, pinangangambahang hindi uusad ang proseso ng impeachment, o kung umusad man, mas pipiliin nila ang kumampi sa maipluwensiyang pamilya na maghahatid sa kanila ng boto o magliligtas sa kanila sa ibinabato sa kanilang kaso.
Pero may iba pang implikasyon ang pagpapalit ng liderato sa Senado. Naaapektuhan din nito ang mga panukalang batas na pakikinabangan ng mga ordinaryong Pilipino. Posibleng mapalitan din kasi ang mga committee chairpersons. Ang bagong mayorya ang magkakaroon ng kapangyarihang magtakda kung aling mga reporma sa batas ang uusad at alin ang mababalam. Sila rin ang magpapasya kung anu-anong mga panukalang batas ang bibigyang-prayoridad.
Maraming komite ang nasa alanganin. May ilang senador na maaaring manatili sa kanilang mga komite, habang ang iba ay maaaring mawalan ng pwesto. Sa ngayon, si Senador dela Rosa pa lamang ang may bagong committee chairmanship—ang Committee on Public Order and Dangerous Drugs. Ang iba pang committee assignments ay iaanunsyo simula ngayong araw.
Ayon kay Senate President Cayetano, habang inaayos pa ang reorganisasyon sa Senado, maaaring magpatuloy muna sa trabaho ang mga naalis na chairpersons, katulad ng pagsasagawa ng hearings at pagsusumite ng committee reports. Pero kapag nakapili na ng bagong majority leader, siya na ang magpapasya kung aling mga panukala ang uusad at alin ang mananatiling nakabinbin.
Kabilang sa mga naapektuhan ng reshuffling ang committees on women, health, at electoral reforms na pinamumunuan ni Senadora Risa Hontiveros. Sa mga komiteng ito tinatalakay ang ilang mahahalagang panukalang batas katulad ng Anti-Hospital Detention Bill, Anti-Political Dynasty Bill, at iba pang health at electoral reforms.
Apektado rin ang Committee on Agriculture ni Senador Kiko Pangilinan. Nitong nakaraang linggo, ilang magsasaka mula Benguet ang bumiyahe pa-Maynila para sana dumalo sa hearing ng Senate agriculture committee. Nag-adjust sila ng kanilang iskedyul at naghanap ng magbabantay sa kanilang bukid at mga anak para makadalo sa hearing. Pero kinailangang i-cancel ang hearing matapos ang biglaang pagbabago sa liderato ng Senado. Hindi lang iyon simpleng kanseladong meeting; nasayang ang kanilang pera at oras, at nawalan ng pagkakataong iparating sa mga mambabatas ang kanilang mga hinaing.
Ayon kay Pope Francis, kapag ang pulitika ay hindi na nakikita bilang paglilingkod sa lipunan, maaari itong maging instrumento ng pang-aapi at pagsasantabi sa kapakanan ng iba. At ito mismo ang panganib kapag mas inuuna ang alyansa at kapangyarihan kaysa sa serbisyo publiko. Sa gitna ng lahat ng political maneuvering na ito sa Mataas na Kapulungan ng Kongreso, ang ordinaryong Pilipino na naman ang naiiwan sa huli.
Mga Kapanalig, sa kabila ng lahat ng ito, paalala sa atin ng Galacia 6:9: “…huwag tayong mapagod sa paggawa ng mabuti sapagkat pagdating ng takdang panahon tayo ay aani kung hindi tayo susuko.” Maaaring magulo ang sitwasyon ngayon, ngunit hangga’t may mga taong naninindigan para sa bayan, may dahilan pa ring umasa. Nawa’y maalala ng ating mga pinuno na ang kanilang sinumpaang paglingkuran ay hindi ang isang tao o pamilya, kundi ang sambayanang Pilipino.
Sumainyo ang katotohanan.
