15,360 total views
Hinikayat ni House impeachment spokesperson at Kabataan Party-list Rep. Renee Co ang publiko, lalo na ang kabataan, na makilahok at maging mapanuri sa impeachment trial ni Vice President Sara Duterte sa Senado.
Ayon kay Co, mahalagang bantayan ng mamamayan ang proseso upang matiyak na magiging patas at nakabatay sa ebidensya ang paglilitis.
“Dapat po ebidensya. Hindi loyalty to one personality, hindi dapat 2028 prospects, pero ebidensya at syempre prinsipyo,” ayon sa mambabatas.
Binigyang-diin ng mambabatas na hindi lamang dapat maging tagamasid ang publiko kundi aktibong makiisa sa mga talakayan, maging sa social media o sa komunidad, kaugnay sa usapin ng pananagutan ng mga opisyal ng pamahalaan.
Ayon kay Co, mahalaga ang boses at pagbabantay ng taumbayan upang matiyak na magiging patas at makatarungan ang impeachment proceedings laban sa Bise Presidente.
Nanawagan din ang mambabatas sa mga senador na pairalin ang ebidensya at prinsipyo sa pagpapasya, at huwag hayaang maimpluwensyahan ng politika o personal na interes ang magiging hatol.
Dagdag pa ni Co, “Panawagan po ito sa lahat ng senators, panawagan po ito sa lahat ng mamamayan: basahin natin, i-engage natin ang ebidensya at gamitin natin ito sa pagmamatyag mismo kung anong dapat tatahakin nating landas para ma-ensure na accountability is always present.”
Patuloy namang naghahanda ang House prosecution panel para sa paglilitis kaugnay ng mga reklamong kinahaharap ni Duterte kabilang ang culpable violation of the Constitution, graft and corruption, betrayal of public trust, bribery, at iba pang malalaking krimen.
