169 total views
Mariing kinondena ng Caritas Philippines ang malawakang pagputol ng mga malalaking puno sa kahabaan ng Quirino Avenue sa Maynila na inilarawan nitong karahasang pangkalikasan laban sa mamamayan, lalo na sa mahihirap na higit na apektado ng matinding init, polusyon, at pagbaha.
Ayon kay Caritas Philippine President, San Carlos Bishop Gerardo Alminaza, hindi simpleng usaping teknikal o administratibo ang pagputol sa mga puno dahil matagal nang nagsisilbing proteksyon at “baga” ng komunidad ang mga ito para sa mga pasaherong araw-araw bumabiyahe, manggagawa, at pamilyang nakararanas ng matinding urbanisasyon.
Dagdag ni Bishop Alminaza, ginagawang kapalit ng tinatawag na kaunlaran ang pagkasira ng kalikasan at kapakanan ng mahihirap upang bigyang-daan ang panibagong expressway project sa lungsod.
“Why must “development” always demand the sacrifice of the vulnerable? Why are our cities designed for vehicles and concrete instead of for children, workers, pedestrians, and the elderly?” pahayag ni Bishop Alminaza.
Binigyang-diin din ng Caritas Philippines na hindi lahat ng legal sa papel ay moral na katanggap-tanggap, lalo na kung nagdudulot ito ng kawalang-katarungang pagtrato sa kalikasan at lalong nagpapahirap sa mga maralita.
Iniugnay din ni Bishop Alminaza ang insidente sa panawagan ni Pope Francis sa ensiklikal na Laudato Si’ laban sa “throwaway culture” na itinuturing na madaling isantabi ang kalikasan at mahihirap alang-alang sa pagpapalawak ng negosyo at imprastraktura.
“This is not stewardship. This is environmental injustice. The climate crisis is a present, urgent and unquestionable reality. In Manila, every mature tree destroyed is a moral failure. It is a wound inflicted on our common home,” giit ni Bishop Alminaza.
Nanawagan naman ang Caritas Philippines sa mga kinauukulan at contractor na agad ihinto ang pagputol ng mga puno, muling suriin ang mga proyekto batay sa katarungang pangkalikasan, at pakinggan ang mga pamayanang umaasa sa nalalabing luntiang espasyo sa lungsod para sa kanilang kaligtasan at kabuhayan.
