6,668 total views
Muling iginiit ng Alyansa Tigil Mina (ATM) ang mariing pagtutol sa reclamation projects sa Manila Bay at iba’t ibang panig ng bansa, kasabay ng panawagan sa administrasyon ni Pangulong Ferdinand Marcos Jr. na agad na ipawalang-bisa ang mga ito.
Ayon kay ATM National Coordinator Jaybee Garganera, hindi dapat balewalain ng pamahalaan ang mga resulta ng Cumulative Impact Assessment (CIA) na isinagawa sa utos ng Department of Environment and Natural Resources (DENR).
Paliwanag ni Garganera, ipinakita sa nasabing pag-aaral na ang reclamation ay nagdudulot ng banta sa kalusugan ng publiko, sumisira sa sirkulasyon ng tubig, kabuhayan ng mga mangingisda, at kapaligiran, at maaaring magdulot ng mas matinding pagbaha.
“In the first place, permits for the reclamation projects should not have been granted if only government previously conducted a thorough environmental impact assessment. Given that there is now overwhelming evidence of the projects’ negative impacts as shown by this belated CIA, PBBM and the DENR must immediately cancel all contracts,” giit ni Garganera.
Bukod sa mga baybaying komunidad ng Cavite at Bataan kung saan aktibong isinasagawa ang seabed quarrying para sa Manila Bay reclamation, iniulat din ng mga mangingisda mula Zambales at Mindoro ang river dredging activities na pinaniniwalaang may kaugnayan din sa nasabing proyekto.
Hinamon naman ng ATM ang bagong talagang DENR Secretary Raphael “Popo” Lotilla na huwag nang patagalin ang pagbawi sa mga permit para sa mga reclamation project.
Tinutulan din ni Garganera ang naunang pahayag ni dating DENR Secretary Yulo-Loyzaga kaugnay sa posibleng modification ng mga Environmental Compliance Certificates (ECCs) sa Manila Bay reclamation.
“Secretary Lotilla should definitely not pursue former DENR Secretary Yulo-Loyzaga’s pronouncement to modify the Environmental Compliance Certificates (ECCs) of the Manila Bay reclamation projects. All reclamation projects must stop now,” ayon kay Garganera.
Binigyang-diin din ng ATM ang kahalagahan ng pangangalaga sa 15-kilometrong municipal water laban sa commercial fishing at mga mapaminsalang proyekto tulad ng seabed quarrying, river dredging, at offshore mining.
Hiniling din ng grupo kay Secretary Lotilla na agad na makipagdayalogo sa mga grupo ng environmental at human rights defenders upang talakayin ang mga usaping dapat unahin ng DENR, kasabay ng pagpapatupad ng mga makakalikasang polisiya.
