307 total views
Inaanyayahan ng pamunuan ng St. Benedict Parish Quezon City ang mga mananampalataya na makibahagi sa Solemn Pontifical Mass bilang tampok na pagdiriwang ng Kapistahan ni San Benito de Nursia sa Hulyo 11, 2026.
Sa programang Barangay Simbayanan, inihayag ni Rev. Fr. Reynaldo Tano, MGL – Parish Priest ng St. Benedict Parish sa Quezon City ang mga nakahanay na gawain para sa nakatakdang kapistahan.
Ayon sa Pari, isasagawa ang Solemn Pontifical Mass ganap na alas-10 ng umaga na pangungunahan ni Novaliches Bishop Roberto Gaa, D.D.
Pagbabahagi ni Fr. Tano, ang pagdiriwang ay pagkakataon upang magpasalamat sa Diyos sa pamamagitan ng panalangin at sama-samang pagpupugay kay San Benito de Nursia, ang patron ng pamayanan.
Inihayag rin ng Pari ang pagiging isang mabuting halimbawa ni San Benito sa pagiging ‘hospitable’ na bukas sa pagtanggap sa bawat isa ng walang pinipili o isinasantabing sinuman.
“To become hospitable po siguro yun po ang itinuturo ni Saint Benedict sa akin na as a priest you must be welcoming hindi lamang sa mga taong gusto mo kundi kahit yung mga taong hindi mo gusto kasi they are also image and likeness of God.” Bahagi ng pahayag ni Fr. Tano sa Radyo Veritas.
Inaasahan ding magsisilbing pagkakataon ang kapistahan upang higit na mapalalim ang pananampalataya ng mga mananampalataya at mapatatag ang kanilang pagtugon sa misyon bilang mga tagasunod ni Kristo.
Ayon kay Fr. Tano, dalangin ng parokya na ang pagdiriwang ay maging daan sa higit na pagkakaisa ng sambayanan at magsilbing paalala ng patuloy na paggabay at pamamagitan ni San Benito de Nursia sa lahat ng deboto at mananampalataya.
