6,208 total reads
Pinangunahan ni Cubao Bishop Elias Ayuban, Jr., CMF ang Banal na Misa bilang pagsisimula ng pagdiriwang ng ika-25 anibersaryo ng pagiging martir ni Claretian missionary Fr. Rhoel Gallardo.
Ginanap ang pagdiriwang sa Gallardo Hall ng Claret School sa Quezon City, nitong February 6, kasabay ng paggunita kay San Pedro Bautista, martir at isa sa mga nagpalaganap ng pananampalataya sa ngayo’y kinasasakupan ng Diyosesis ng Cubao.
Sa panayam ng Radio Veritas kay Bishop Ayuban, maituturing na biyaya mula sa Diyos ang pagkakataong sabay na gunitain ang dalawang martir na nag-alay ng buhay para sa pananampalataya.
“I am a witness to the life of Fr. Rhoel. We were together in the seminary and it’s very providential that we celebrate this launching on the occasion of the feast of St. Pedro Bautista, also a martyr, and one of the founders of the Church of Cubao,” ayon kay Bishop Ayuban.
Si Fr. Gallardo, kasama ang ilang guro at mag-aaral ng Claret School of Tumahubong at mga karatig na paaralan sa Basilan, ay binihag ng grupong Abu Sayyaf at dinala sa kampo ng mga rebelde sa Bundok Punoh Muhadji.
Sa loob ng 44 na araw, dumanas sila ng matinding pagpapahirap hanggang sa tuluyang magbuwis ng buhay si Fr. Gallardo noong May 3, 2000, sa edad na 34—halos limang taon matapos ordinahan bilang pari.
Samantala, matapos ang Misa ay isinagawa naman ang media launching at press conference para sa pelikulang “In Thy Name” na naglalayong ipakita ang pagmimisyon at pag-aalay ng buhay ni Fr. Gallardo alang-alang sa pananampalataya.
Hinikayat ni Bishop Ayuban ang lahat na suportahan at panoorin ang pelikula at gawing inspirasyon ang buhay ng paring martir, na buong pusong sumunod kay Kristo.
“It would bring us a lot of insights, how Fr. Rhoel offered his life, how he denied himself, how he took up his cross and followed the Lord until the last drop of his blood. It would inspire us to be more dedicated missionary disciples following the footsteps of Jesus Christ,” saad ni Bishop Ayuban.
Gagampanan ng aktor na si McCoy de Leon ang buhay ni Fr. Gallardo, kasama sina JC de Vera, Mon Confiado, Jerome Ponce, Aya Fernandez, at marami pang iba.
Ang pelikula ay likha ng Viva Films at GreatCzar Productions sa direksyon nina Cesar Soriano at Rommel Galapia Ruiz, at nakatakdang ipalabas sa March 5, 2025.
