1,173 total views
Nanawagan si Living Laudato Si’ Philippines executive director Rodne Galicha sa publiko na maging mapanuri bago makibahagi, sumuporta, magbigay ng donasyon, o kumatawan sa anumang grupong nagpapakilalang opisyal na “Climate Change Task Force” na konektado sa Climate Change Commission (CCC) at Office of the President.
Ayon kay Galicha, mahalagang tiyakin muna kung may sapat na legal na batayan at opisyal na pagkilala ang naturang organisasyon upang maiwasan ang pagkalito at posibleng maling paggamit ng pangalan ng pamahalaan.
“Climate action is too important to be clouded by confusion, unauthorized representation, or possible misuse of government branding,” pahayag ni Galicha.
Sinabi nito na batay sa mga pampublikong impormasyon, wala pang malinaw na Executive Order, Administrative Order, Memorandum Circular, o opisyal na CCC En Banc Resolution na hayagang lumilikha o nagbibigay ng mandato sa naturang national task force.
Iginiit ni Galicha na ang lehitimong climate governance ay dapat na transparent, may pananagutan, nakabatay sa batas, at may malinaw na mandato.
“We urge all concerned agencies, including the Climate Change Commission and the Office of the President, to clarify the official status, mandate, and authority of this organization to avoid misleading the public,” dagdag pa nito.
Hinimok din ni Galicha ang publiko, kabilang ang mga mag-aaral, volunteers, local government units, non-government organizations, at mga pamayanan na laging tiyakin ang mga opisyal na dokumento at kautusan bago makiisa sa anumang climate-related organization.
“Always verify. Always ask for official issuances. Public trust matters,” ayon kay Galicha.
Nauna rito, napaulat ang ilang oath-taking at volunteer recruitment activities na iniuugnay sa CCC kaugnay ng tinatawag na Climate Change Task Force, ngunit nananatiling usapin ang opisyal na mandato at legal na batayan nito.
Binigyang-diin sa Laudato Si’ ni Pope Francis na mahalagang nakabatay sa katotohanan, pananagutan, at malasakit sa mamamayan ang bawat hakbang sa pangangalaga sa kalikasan at pagsusulong ng mga hakbang para tugunan ang umiiral na krisis sa klima.
