13,076 total reads
Ayon sa grupo, matagal nang nararanasan ng mga komunidad at kanilang mga katuwang na organisasyon ang masamang epekto ng malawakang pagmimina at iba pang mapaminsalang proyekto sa kalikasan.
Tinukoy ng PMPI ang mga kasong kinakaharap ng mga miyembro ng Homonhon Environmental Advocates and Rights Defenders (HEARD), na anila’y bahagi ng pagtatangkang patahimikin ang mga tumututol sa pagmimina.
Nagpahayag din ng pagkabahala ang organisasyon sa pagkakadawit ni Bayombong Bishop Jose Elmer Mangalinao, kasama ang ilang pari at mga tagapagtanggol ng kalikasan, sa isang kasong sibil kaugnay ng kanilang pagtutol sa panukalang 4,456-hectares na mining exploration project sa Kasibu, Nueva Vizcaya.
“When a bishop is sued simply for celebrating Mass, offering prayers, and standing with Indigenous communities, the law has been severed from its moral foundation,” pahayag ng PMPI.
Nanawagan ang PMPI sa mga ahensya ng pamahalaan at mga institusyong pangkatarungan na tiyakin ang epektibong proteksyon sa mga environmental defenders at igalang ang karapatan ng mga komunidad at mga Katutubong Pamayanan.
Hinimok din ng grupo ang mga kumpanya na itigil ang paggamit ng legal na sistema laban sa mga komunidad, lider ng simbahan at mga tagapagtanggol ng kalikasan, at igalang ang Free, Prior and Informed Consent (FPIC) ng mga katutubong pamayanan.
Nanawagan din ang PMPI sa mga mamamayan at mananampalataya na makiisa sa pagtatanggol sa kalikasan at suportahan ang mga komunidad na nagsusulong ng katarungang pangkalikasan.
“We are now witnessing a catastrophic role reversal where corporations enjoy greater protection than communities and ecosystems. This must end. The era of ecological justice must begin,” saad ng PMPI.
