7,790 total reads
Magpapadala ng karagdagang P1.8 milyon cash assistance ang Caritas Manila para sa Bicol dioceses na labis na nasalanta ng Bagyong Kristine.
Makakatanggap ng tig-P300,000 karagdagang tulong ang anim na diyosesis sa Bicol Region kabilang ang Archdiocese of Caceres at Diocese of Libmanan sa Camarines Sur; Diocese of Virac, Catanduanes; Diocese of Daet, Camarines Norte; Diocese of Legazpi, Albay; at Diocese of Sorsogon.
Dahil dito, aabot na sa P3-milyon ang kabuuang halaga ng tulong mula sa social arm ng Archdiocese of Manila.
Sa kasagsagan ng pananalasa ng bagyo noong nakaraang lingo, nagpadala ang Caritas Manila ng P1.2 milyong paunang tulong para sa Bicol, kung saan nakatanggap ng tig-P200,000 ang anim na diyosesis.
Nagpaabot naman ng pasasalamat ang social action center directors mula sa mga natulungang diyosesis sa cash assistance ng Caritas Manila.
Ayon kay Legazpi SAC director, Fr. Eric Martillano, naghahanda na ang diyosesis para sa rehabilitation and recovery efforts bagamat may mga hindi pa napapadalhan ng tulong sa Albay, partikular sa bayan ng Jovellar at Pantao sa Libon, dahil hindi pa madaanan ang mga kalsada.
“Napakalayo ng lugar and very poor. Based sa assessment namin, ito na lang ang may strong need for relief. For the rest of the affected population, gusto na namin mag-transition sa rehab and recovery initiatives. Thank you so much po sa tulong,” ayon kay Fr. Martillano sa panayam ng Radio Veritas.
Nagpapatuloy rin ang relief operations ng Caritas Virac, sa pangunguna ni Fr. Renato dela Rosa, kung saan kabilang sa mga natulungan ang isang baryo sa Caramoran, Catanduanes na sinalanta ng buhawi sa kasagsagan ng Bagyong Kristine.
“Salamat pong muli sa Caritas Manila at Radio Veritas Manila! Dahil sa tulong ninyo, nakapag-relief operations na kami. Tamang-tama, may mga naka-preposition kaming mga balde at tabo galing din sa inyo, at naisama namin sa pamamahagi para sa mga nasalanta ng buhawi sa baryo sa Caramoran,” ayon kay Fr. dela Rosa.
Patuloy rin ang pagtugon nina Caritas Caceres director, Fr. Marc Real, sa mga apektadong lugar sa Camarines Sur, at Caritas Sorsogon director, Fr. Ruel Lasay, kasama si Bishop Jose Alan Dialogo sa pamamahagi ng tulong sa bayan ng Donsol na labis ding naapektuhan ng bagyo.
Batay sa tala ng National Disaster Risk Reduction and Management Council (NDRRMC), mahigit dalawang milyong indibidwal o higit 500-libong pamilya ang naapektuhan ng pananalasa ng Bagyong Kristine sa Bicol Region.
