4,769 total views
Mariing tinutulan ng Renacimiento Manila ang pansamantalang pagsuspinde ng Department of Environment and Natural Resources (DENR) sa pagputol ng mga puno para sa mga nakaplanong skyway project ng San Miguel Corporation (SMC).
Iginiit ng grupo na hindi nito tinutugunan ang pinagmumulan ng suliranin at hindi katumbas ng tuluyang pagkansela ng mga proyekto.
Ayon sa Renacimiento Manila, ang anunsyo ng DENR hinggil sa “temporary suspension” ng tree-cutting activities at paglilipat ng ilang puno mula Quirino Avenue ay hindi tumutugon sa lumalakas na pagtutol ng publiko sa mga proyektong Southern Access Link Expressway (SALEX), Northern Access Link Expressway (NALEX), Pasig River Expressway (PAREX), at iba pang elevated road projects sa Metro Manila.
“We do not need more skyways. Skyways are not ‘green.’ They are massive concrete heat sinks that turn communities into urban blight. No number of replacement seedlings can compensate for the destruction of decades-old trees and the irreversible damage these projects will inflict upon Manila’s already fragile environment,” pahayag ng Renacimiento Manila.
Binigyang-diin ng grupo na nanganganib na maapektuhan ng mga proyekto ang mga nalalabing luntiang espasyo, pamanang pook, daluyan ng tubig, at mga komunidad sa Maynila kabilang ang Roxas Boulevard, Pasig River, Ermita, Malate, at Intramuros.
Iginiit din nito na hindi sapat para sa kanila ang pansamantalang pagsuspinde ng DENR dahil nauna nang sinabi ng SMC na muling pag-aaralan ang PAREX ngunit kalaunan ay ipinagpatuloy pa rin ang proyekto na may kaunting pagbabago lamang.
“No amount of cosmetic revisions or ‘green’ branding can change the fact that these projects will destroy trees, damage communities, worsen heat, and make Manila even less livable,” dagdag pa ng grupo.
Kaugnay nito, nagsagawa noong Mayo 31 ang Renacimiento Manila, kasama ang Angat Kalikasan Pilipinas, at Panatang Luntian, ng “Lakad Kalikasan,” isang protest heritage walk sa Malate bilang pagtutol sa pagputol ng mga puno sa Quirino Avenue at sa mga nakatakdang skyway projects ng SMC.
Dinaluhan ng humigit-kumulang 70 kalahok at mga kinatawan ng iba’t ibang organisasyon ang gawain na nagsimula sa dating Quirino Rotonda at nagtapos sa Plaza Rajah Sulayman, habang tinalakay ang kasaysayan, pamanang kultura, at mga suliraning pangkapaligiran sa lugar.
“Our fight for Manila’s future continues. We envision a city where heritage, culture, sustainability, and people-centered development go hand in hand—not a concrete hellscape shaped solely by the interests of corporations and useless bureaucrats,” ayon sa grupo.
Nanawagan ang Renacimiento Manila sa pamahalaan at mga kinauukulang ahensya na tuluyan nang isantabi ang mga skyway project at panagutin ang mga responsable sa pagpaplano at pag-apruba ng mga ito.
Nakasaad sa ensiklikal na Laudato Si’ ni Pope Francis na ang pangangalaga sa kalikasan ay moral na tungkulin na kaakibat ng katarungan, pananagutan, at pangangalaga sa nag-iisang tahanan.
