8,267 total views
Inilaan ni Kanyang Kabanalan Pope Leo XIV ang kanyang prayer intention ngayong buwan ng Hulyo para sa paggalang at pangangalaga sa buhay ng tao sa lahat ng yugto nito.
Layunin ng Santo Papa na ipanalangin ang higit na pagkilala sa kasagraduhan ng buhay bilang isang natatanging kaloob ng Diyos na dapat igalang, pangalagaan, at ipagtanggol mula sa paglilihi hanggang sa likas na kamatayan.
Binigyang-diin din ni Pope Leo XIV ang kahalagahan ng pagtataguyod sa dignidad ng bawat tao, lalo na sa gitna ng iba’t ibang banta sa buhay at paglabag sa karapatang pantao sa iba’t ibang bahagi ng daigdig.
“Let us pray for the respect and protection of human life in all its stages, recognizing it as a gift from God,” panalangin ng Santo Papa para sa buwan ng Hulyo.
Muli ring ipinapaalala ng Santo Papa na ang bawat buhay ng tao ay mahalaga at dapat pahalagahan anuman ang kalagayan, edad, o antas sa lipunan.
Hinihikayat din ni Pope Leo XIV ang mga mananampalataya na maging tagapagtanggol ng buhay sa pamamagitan ng pagpapakita ng malasakit, pakikiisa, at pagtataguyod ng kultura ng paggalang at pagmamahal sa kapwa.
Una nang binigyang-diin ng Santo Papa na ang tunay na pag-unlad ng lipunan ay nakabatay sa pagkilala at paggalang sa likas na dignidad ng bawat tao bilang nilikha sa wangis ng Diyos.
Bahagi rin ng panawagan ng Santo Papa ang pagpapaalala na ang Simbahan ay patuloy na nakikiisa sa pagtatanggol sa buhay at sa pangangalaga sa mga pinakamahihina at higit na nangangailangan sa lipunan.
Ang Pope’s Worldwide Prayer Network ay buwanang naglalabas ng prayer intention ng Santo Papa upang hikayatin ang mga mananampalataya na sama-samang manalangin para sa mga mahahalagang usapin sa Simbahan at sa daigdig.
