4,875 total views
Mariing kinondena ni Puerto Princesa, Palawan Bishop Socrates Mesiona, ang marahas at hindi makatarungang pagpaslang kay Attorney Joshua Lavega Abrina.
Ayon kay Bishop Mesiona, ang krimeng ito ay hindi lamang malungkot na pagkawala para sa pamilya at mga kaibigan ng abogado, kundi malinaw ding paglabag sa karapatan ng taong mabuhay.
“In a society where every individual should feel safe and secure, the reckless taking of another person’s life is entirely unacceptable,” pahayag ni Bishop Mesiona.
Si Abrina, na nagsilbing legal officer ng Department of Education Palawan at Philippine Ports Authority Palawan, ang ikawalong abogado na pinaslang mula nang maupo si Pangulong Ferdinand Marcos Jr. noong 2022, batay sa tala ng National Union of Peoples’ Lawyer.
Ayon sa ulat ng pulisya, kagagaling lamang ng biktima mula sa isang prayer meeting kasama ang kanyang pamilya nang pagbabarilin ng hindi pa nakikilalang salarin sa tapat ng kanilang tahanan sa Barangay San Jose, Puerto Princesa, dakong alas-8:15 ng gabi noong September 17, 2025.
Naisugod pa sa hospital si Abrina ngunit idineklara ring dead on arrival.
Umaasa naman si Bishop Mesiona na gagamitin nang lubos ang kapangyarihang ng batas upang mapanagot ang mga nasa likod ng krimen.
“The pursuit of justice must be unwavering, ensuring that those who commit such violent crimes are held accountable and face the consequences of their actions,” dagdag ni Bishop Mesiona.
Samantala, nagpahayag din ng pagkondena ang Integrated Bar of the Philippines (IBP), partikular ang IBP Palawan Chapter, na nangakong hindi titigil hangga’t hindi natitiyak ang katarungan para kay Abrina.
