353 total views
Pagsagip sa buhay ng mga nagkakamali ang pagpuna ng Simbahang Katolika sa maling polisiya ng Pangulong Rodrigo Duterte lalo na sa kampanya laban sa bawal na gamot at hindi ang ibagsak ito.
Ito ang reaksyon ni Novaliches Bishop Emeritus Teodoro Bacani Jr. kaugnay na rin sa mga hindi magagandang pahayag ng Pangulo laban sa mga pumupuna sa kanyang ginagawa partikular na sa mga taong-Simbahan.
Ayon sa obispo, dapat iligtas ang mga nagkakamali mula sa kamatayang ipapataw sa kanila dahil ang lahat ay may karapatan magbago at mabuhay.
“Tungkol sa pagsasabi ng katotohanan at pagpuna ng mali, ito’y ginagawa natin hindi para sa ating sarili, ginagawa natin ‘to hindi para ibagsak ang presidente kundi para iligtas ang mga buhay ng mga tao na dapat nating sikapin na tulungan sa halip na patayin, ” pahayag ni Bishop Bacani sa panayam ng Radio Veritas.
Kaugnay nito, patuloy na umaasa si Bishop Bacani na sama-samang magsasalita ang mga taga Simbahan gaya ng mga obispo laban sa nagaganap na death under investigation upang maging malakas at makapangyarihan ang mga panawagan na ang lahat ng tao ito man ay makasalanan ay may karapatang magbago at mabuhay.
“Harinawa, ako ay umaasa naman na ang mga Obispo ay sama-samang magsasalita laban dito sa Extrajudicial Killing, may mga Obispo na nagsasalita na dyan, mabuting sama-sama na magsalita ang mga Obispo.”
Sa huling datos ng Philippine National Police, sa nakaraang 6 na buwan, nasa humigit kumulang 6,200 na ang kaso ng pagpatay may kinalaman sa kampanya ng pamahalaan laban sa bawal na gamot at halos 2,000 lamang dito ang may kinalaman sa lehitimong operasyon ng pulisya.
