772 total reads
Makinig sa pagtangis ng kapwang nangangailangan ng pagkalinga gaya ng mga Persons Deprived of Liberty (PDLs).
Ito ang panawagan ni Rev. Fr. Nezelle O. Lirio,Executive Secretary ng CBCP-Episcopal Commission on Prison Pastoral Care (CBCP-ECPPC) kaugnay sa pagsisimula ng 35th Prison Awareness Week ngayong taon.
Ayon sa Pari, mahalaga ang pakikinig sa kapwa maging sa pagtangis ng mga bilanggo na nakagawa ng pagkakasala sa batas at kapwa.
Ipinaliwanag ni Fr. Lirio na mahalaga ang pakikinig upang makapagbuo ng mas epektibong correctional community na makapagdudulot ng paghilom, at ganap na pagbabalik loob sa mga nagkasala.
Sinabi ng Pari na ipinapaalala ng Prison Awareness Week na sa kabila ng mga kasalanang nagawa ay hindi pa rin naaalis ang dignidad ng mga bilanggo bilang isang tao.
“Let us listen to each other’s cries, let us listen to the cries of our PDL brothers and sisters in order for us to form a healing and a reforming and a loving correctional community.”panawagan ni Fr. Lirio.
Ayon sa Pari, ang Panginoon ang tunay na huwaran ng pakikinig sa tawag ng sangkatauhan na sa kabila ng pagiging makasalanan ay mas nangingibabaw ang kanyang pagmamahal.
“God perfectly knows the art of listening that is why he is able to love us despite our imperfections. Napakagaling pong makinig ng Diyos, napakagaling makinig ng ating Panginoon kaya sa kabila po ng ating mga kasalanan kayang kaya pa rin tayong mahalin”.Dagdag pa ni Fr. Lirio.
Tema ng 35th Prison Awareness Week na gugunitain mula mula ika-24 hanggang ika-30 ng Oktubre, 2022 ang “Towards Listening, Healing and Loving Correctional Community” na naglalayong higit na mapaigting ng Simbahan ang pakikinig sa mga hinaing ng mga bilanggo o PDLs (Persons Deprived of Liberty).
