408 total reads
Hinimok ni Diocese of Marbel South Cotabato Bishop Dinualdo Gutierrez ang mamamayan lalo na ang mga kandidato na simulan ng linisin ang mga ikinalat nitong election paraphernalia.
Ayon sa Obispo, nanalo man o natalo ang mga kandidato, mahalagang ipakita ang tunay na serbisyo-publiko sa pangunguna sa paglilinis sa mga kalat ng eleksyon.
Iginiit naman ni Bp. Gutierez na maging ang Comelec ay kailangang tumulong sa paglilinis ng mga ginamit sa eleksyon at tiyakin ang seguridad ng mga kagamitan nito.
“Be diligent and clean, before election e marami nang mga sample ballots na kumakalat so we should try to clean the environment and yung sa ComElec you should try to get all your equipments and deposit them secure them.” Pahayag ni Bp. Gutierez.
Kaugnay dito, sinimulan na ng Ecowaste Coalition ang post-election clean up ngayong araw sa Project 6 Elementary School, Rd. 2, Cor. Rd. 6, Project 6, Quezon City.
Ayon kay Aileen Lucero, National Coordinator ng grupo, tuwing eleksyon ay pinangungunahan nila ang paglilinis sa mga campaign paraphernalia at tinuturuan ang mga mamamayan kung paano ito muling magagamit.
“Kasi ito ay merong panibagong buhay, yung mga tarpaulins ay pwede natin gawing bag o iba pang mga gamit na may kapakinabangan pa at hindi lamang dalin sa dumpsite, sa landfill o hindi dapat sinusunog.” Pahayag ni Lucero.
Samantala, nais rin ni Lucero na mapaigting ang pagpapatupad sa “No Clean Up, No Proclamation Policy,” dahil aniya, bagamat may inilunsad na programa ang Metropolitan Manila Development Authority o MMDA, ay hindi naman ito gaanong napagtutuunan ng pansin at sinusunod lalo na sa local level.
Noong 2010, ayon sa MMDA umabot sa labinlimang truck ng eletion paraphernalia ang kanilang nakolekta.
Nitong Enero 2016, naglunsad ang Department of Environment and Natural Resources kasama ang Department of Interior and Local Government at Commission on Elections ng Basura –Free Election 2016 upang tiyakin ang maayos na pag-dispose sa mga basura.
