9,124 total reads
Inilaan ng Kanyang Kabanalan Pope Leo XIV ang kanyang prayer intention ngayong buwan ng Setyembre para sa makatarungang pangangalaga at sustainable management o napapanatiling pamamahala sa tubig, bilang mahalagang yaman na kinakailangan ng bawat tao.
Sa kanyang September Prayer Intention, hinihikayat ng Santo Papa ang bawat isa na magkaroon ng malasakit sa pangangalaga at wastong paggamit ng tubig upang matiyak na walang maiiwan at lahat ay magkaroon ng pantay na access sa mahalagang yamang ito.
Binigyang-diin din ni Pope Leo XIV ang pangangailangang tiyaking ang tubig ay napapamahalaan nang makatarungan at napapanatili upang mapakinabangan ito ng kasalukuyan at mga susunod na henerasyon
“For the care of water: Let us pray for a just and sustainable management of water, a vital resource, so that everyone may have equal access to it.” panalangin ng Santo Papa para sa buwan ng Setyembre.
Muli ring ipinapaalala ng Santo Papa na ang tubig ay isang mahalagang yaman na hindi dapat maging pribilehiyo lamang ng iilan, kundi dapat mapakinabangan ng lahat, lalo na ng mga komunidad na higit na nakararanas ng kakulangan sa malinis at ligtas na suplay ng tubig.
Hinihikayat din ni Pope Leo XIV ang mga mananampalataya na magkaroon ng higit na malasakit sa pangangalaga sa kalikasan at maging responsable sa paggamit ng mga likas na yaman, kabilang ang tubig na mahalaga sa pagpapanatili ng buhay at kalusugan ng bawat tao.
Sa gitna ng mga hamon dulot ng climate change, polusyon, tagtuyot, pagbaha at hindi pantay na access sa likas na yaman, naniniwala ang Simbahan na mahalaga ang sama-samang pagkilos upang mapangalagaan ang tubig at matiyak ang patas na pamamahagi nito sa mga nangangailangan.
Bahagi rin ng panawagan ng Santo Papa ang pagpapaalala na ang pangangalaga sa kalikasan ay hindi lamang usapin ng kapaligiran kundi isang pananagutan sa kapwa, lalo na sa mga mahihina at higit na naaapektuhan ng kakulangan sa likas na yaman.
