12,648 total reads
Bibigyang-diin ng Archdiocesan Basic Ecclesial Communities (BEC) General Assembly ang sama-samang pagkilos para sa kalikasan bilang pagpapahayag ng lumalalim na pananampalataya sa pagtitipon sa September 19 sa San Andres Sports Complex sa Malate, Maynila.
Sa temang “Nagkakaisang BEC: Sama-samang Pangangalaga sa Kalikasan, Tanda ng Paglago sa Pananampalataya,” layon ng pagtitipon na pagtibayin ang pagkakaisa, pakikibahagi at pananagutan ng mga BEC sa pangangalaga sa kapwa at sangnilikha.
Ayon sa programa ng pagtitipon, mahalagang maisabuhay ng mga kasapi ng BEC ang pananampalataya “sa pamamagitan ng kongkretong gawaing nagmamalasakit sa tao at sa kalikasan.”
Inaanyayahan ng Ministry on BEC Promotion and Formation ng Archdiocese of Manila ang mga parish priest at BEC promoters na dumalo sa taunang pagtitipon, kung saan inaasahan ang 1,820 na delegado o 20 kinatawan mula sa bawat parokya sa 91 parokya ng arkidiyosesis.
Pangungunahan ni Manila Archbishop Jose Cardinal Advincula ang Banal na Misa sa ganap na ika-3 ng hapon.
Tampok din sa programa ang ulat tungkol sa mga naisakatuparan ng Archdiocesan BEC, mga interactive activities, at talakayan hinggil sa integral ecology na pangungunahan ni Adrian Tambuyat, O.P., coordinator ng RCAM Ministry on Integral Ecology.
