Mariing nagpahayag ng suporta si Lingayen-Dagupan Archbishop Socrates Villegas kay Philippine Coast Guard Spokesperson Commodore Jay Tarriela sa patuloy nitong pagtatanggol sa soberanya ng Pilipinas sa West Philippine Sea.
Ang pahayag ng arsobispo ay kasunod ng umiigting na tensyon at panggigipit ng China sa mga Pilipinong mangingisda at mga tauhan ng pamahalaan na nagbabantay sa karagatang sakop ng bansa.
Sa isang social media post, kinondena ni Archbishop Villegas ang mga agresibong hakbang ng China laban sa Pilipinas.
“China has seized vast seas, bullied fisher folk from traditional grounds with water cannons on frail bancas, injured our personnel, and militarized islands near our shores—violating our right to peace,” ayon kay Archbishop Villegas.
Binigyang-diin ng arsobispo na ang usapin sa West Philippine Sea ay hindi lamang pampulitika kundi isa ring usaping moral at pastoral.
Pinuri rin ni Archbishop Villegas ang matatag na paninindigan ni Tarriela sa pagtatanggol sa maritime zones ng bansa alinsunod sa international at domestic law.
“This is not merely political but profoundly pastoral, affecting present and future generations’ well-being. I personally admire your fearless defense of our maritime zones, sovereign by international and domestic law,” dagdag pa ng arsobispo.
Iginiit ng arsobispo na ang paninidigan ng Simbahan ay nakabatay sa Catholic social teaching hinggil sa dignidad ng tao at pagtatanggol sa karapatan.
“The Church teaches that every person has ‘the natural right to be recognized as a free and responsible being,’ with freedom protected for the common good. Justice, inseparable from charity, demands defending legitimate rights,” ani ng arsobispo.
Sa kabila ng mga kritisismo mula sa ilang sektor, tiniyak ni Archbishop Villegas ang patuloy na pananalangin ng Simbahan para sa mga pinuno ng bansa na manindigan para sa kapakanan ng mamamayan.
“Despite shaming from pro-China politicians, your stand safeguards God’s people and future Filipinos. We salute your principled statesmanship and fidelity to oath,” saad ng arsobispo.
Dalangin ni Archbishop Villegas ang paggabay ng Mahal na Birheng Maria, lalo na sa Stella Maris o “Our Lady, Star of the Sea,” para sa kaligtasan ng mga mangingisdang Pilipino at mga uniformed personnel na nagbabantay sa karagatan.
Patuloy ang panawagan ng Simbahan para sa pangangalaga sa dignidad ng tao, katarungan at kapayapaan sa gitna ng umiigting na tensyon sa West Philippine Sea, isang usaping may direktang epekto sa kabuhayan ng mga mangingisda at sa kinabukasan ng bansa.
