418 total views
Inatasan ni Pangulong Ferdinand Marcos Jr. si General Nicolas Torre III, ang bagong hepe ng Philippine National Police (PNP), na tiyaking malinis ang hanay ng pulisya at pag-ibayuhin ang ‘police visibilty’ sa mga komunidad.
Ang direktiba ni Pangulong Marcos ay makaraang pangunahan ang seremonya ng pagpapalit ng liderato sa PNP, kung saan pormal na nagretiro si Police General Rommel Francisco Marbil.
Ayon sa Pangulo, ang pag-upo ni Torre bilang bagong PNP Chief ay dumating sa tamang panahon, lalo na sa harap ng mga panawagan para sa mas malinaw na direksyon, katapangan, at panibagong tiwala sa institusyon.
Giit ng punong ehekutibo na malalaking hamon ang kinakaharap ng bansa gaya ng transnational crimes, cyber threats, karahasang dulot ng extremism, at mga kaso ng katiwalian sa loob mismo ng PNP.
Binigyang-diin ni Marcos ang kahalagahan ng pagpapanatiling malinis at marangal ang PNP, at hinimok si Torre na pabilisin ang mga imbestigasyon sa mga kasong kinasasangkutan ng mga tiwaling pulis upang agad na matangggap ang katarungan.
“Hamon ko sa ‘yo, panatilihin mong malinis at marangal ang hanay ng kapulisan. Bilisan ang imbestigasyon sa mga kaso laban sa mga pulis na lumabag sa batas upang maibigay natin ang hustisya sa lalong madaling panahon,” ayon kay Pangulong Marcos.
Tagubilin din ng Pangulo ang pagpapalakas ng presensya ng mga pulis sa mga lansangan upang agad na makaresponde sa panahon ng pangangailangan ng publiko. Binigyang-diin din niya ang pagpapatuloy ng pakikipag-ugnayan ng PNP sa mga komunidad at iba pang sektor upang mapanatili ang kaayusan at kapayapaan sa lipunan.
Hinimok din ng Pangulo ang pagpapatuloy ng kampanya kontra ilegal na droga, sa tulong ng Philippine Drug Enforcement Agency (PDEA), at ang mga operasyon laban sa mga drug lord at lider ng sindikato.
”Sa tulong ng PDEA, ipagpatuloy ninyo ang paglaban sa illegal na droga. Magsagawa pa rin tayo ng drug seizures at tiyakin na sasampahan ng kaso ang mga drug dealer at ang mga drug lord. Patuloy din kayong magmatyag sa ating mga komunidad para kahit ang small time na mga drug dealers ay wala ring ligtas,” pahayag pa ni Marcos.
Pinaalalahanan din ng Pangulo ang buong hanay ng pulisya na iwasan ang paggamit ng kanilang pribilehiyo para sa pansariling interes.
