46,770 total reads
Tiniyak ng mga pinuno ng Simbahang Katolika sa Jerusalem na maipagdiriwang ang Semana Santa at Pasko ng Pagkabuhay sa Church of the Holy Sepulchre, sa kabila ng umiiral na tensyon at digmaan sa rehiyon.
Ayon sa Latin Patriarchate of Jerusalem at Custody of the Holy Land, nagkaroon na ng kasunduan sa mga pinuno ng Israel upang masiguro ang pagsasagawa ng mga liturhiya at sinaunang tradisyon sa banal na lugar.
“In agreement with the Israeli Police, access for representatives of the Churches has been secured in order to conduct the liturgies and ceremonies and to preserve the ancient Easter traditions at the Church of the Holy Sepulchre,” ayon sa pahayag.
Ayon pa sa pahayag, “The Latin Patriarchate of Jerusalem and the Custody of the Holy Land reaffirm their commitment to dialogue, mutual respect, and the preservation of the Status Quo.”
Sa ilalim ng kasunduan, pinayagan ang limitadong pagpasok ng mga kinatawan ng iba’t ibang simbahan upang maidaos ang mga seremonya, kasabay ng mahigpit na paiiraling seguridad.
Nauna rito, nagkaroon ng insidente kung saan pansamantalang hinarang ng pulisya ng Israel si Latin Patriarch of Jerusalem, Cardinal Pierbattista Pizzaballa at Fr. Francesco Ielpo, Custos of the Holy Land sa pagpasok sa simbahan noong Linggo ng Palaspas.
Dahil sa patuloy na digmaan, nananatili ang mga restriksyon sa malalaking pagtitipon, kaya’t isasagawa ang live streaming ng mga misa at panalangin upang makalahok ang mga mananampalataya sa buong mundo.
Nagpasalamat naman ang mga lider ng simbahan sa mga opisyal ng Israel, kabilang ang pangulo nito, gayundin sa iba’t ibang lider ng mundo na nagbigay ng agarang suporta upang matuguan ang usapin.
Binigyang-diin din ng mga religious leaders ang kahalagahan ng kalayaan sa pananampalataya, maging sa gitna ng kaguluhan, at ang pangangailangang mapanatili ang karapatan ng lahat na makapagsagawa ng pagsamba.
Patuloy namang nakikipag-ugnayan ang simbahan sa mga awtoridad habang nananalangin para sa pagtatapos ng digmaan at pagkamit ng kapayapaan sa rehiyon.
