Naniniwala si Pope Leo XIV na ang wastong edukasyon at gabay sa paggamit ng teknolohiya ang susi upang maprotektahan ang mga bata at kabataan sa panahon ng artificial intelligence (AI).
Ito ang naging mensahe ng Santo Papa sa pagpupulong sa Vatican hinggil sa “dignity of children and adolescents in the age of artificial intelligence.”
Ayon sa kanya, mahalagang ang mga magulang, guro at institusyon ay maging mas mulat sa epekto ng AI sa paghuhubog ng isip at asal ng kabataan.
Binigyang-diin ng santo papa na ang mga menor de edad ay “particularly vulnerable to manipulation through AI algorithms” na maaaring makaapekto sa kanilang mga pagpili at kagawian.
“Only by taking an educational, ethical and responsible approach can we ensure that artificial intelligence serves as an ally, and not a threat, in the growth and development of children and adolescents,” pahayag ni Pope Leo XIV.
Giit pa ng Santo Papa, hindi sapat ang pagkakaroon lamang ng mga polisiya sa paggamit ng teknolohiya; kinakailangan ding palakasin ang digital education upang maging bukas ang kamalayan ng publiko sa tamang paggamit ng AI.
“Safeguarding the dignity of minors cannot be reduced to policies alone; it also requires a digital education. Governments and international organizations have a responsibility to design and implement policies that protect the dignity of minors in this era of AI,” dagdag ng santo papa.
Umapela rin si Pope Leo XIV sa mga nakatatanda na maging aktibong tagapag-gabay, hindi lamang sa pagbibigay ng impormasyon kundi sa mismong paghubog ng karakter ng kabataan sa mundo ng teknolohiya.
“Adults must rediscover their vocation as ‘artisans of education’ and strive to be faithful to it. This is a vital exercise in safeguarding human originality and connectedness, guided by respect for human dignity as a fundamental value,” ayon sa Santo Papa.
Matagal nang turo ng Simbahan, mula pa sa ensiklikal na Inter Mirifica noong 1963, na ang teknolohiya ay dapat gamitin para sa kabutihan—para sa pagpapalaganap ng katotohanan at pagpapatibay ng moral na pamumuhay.
