“SIRAIN ANG BUBONG”

Para sa isang smartphone?

 21,797 total views

Mga Kapanalig, sinong ayaw manalo ng pinakabago at pinakasikat na smartphone?

Ganito inakit ng isang sikat na social media influencer ang mahigit 50 milyong social media followers niya kamakailan. Magpapa-raffle daw siya ng 100 smartphones sa 100 niyang followers. Pero may isang kondisyon: kailangang i-follow ang social media page ng online gambling platform na ineendorso niya. Hindi nagtagal, naging viral ang video at umabot ito sa mahigit 280 milyong views, mahigit 8 milyong reactions, at mahigit 7 milyong comments.

Maaaring isipin ng ilan: anong masama sa pag-follow sa social media page ng isang casino kung bagong cellphone ang magiging kapalit? Lisensyado rin naman ng Philippine Amusement and Gaming Corporation (o PAGCOR) ang naturang online casino, kaya hindi naman iligal sumali sa raffle, ‘di ba?

Ang bawat “follow” o “like” sa social media page ng isang online gambling platform ay tumutulong para mas lalo pa itong makita ng mas maraming tao, kasama ang mga bata. Dahil sa paraan ng paggana ng mga algorithm sa social media, mas madalas na lalabas sa ating feeds ang mga katulad nitong nilalaman. Unti-unti nitong ginagawang ordinaryong libangan ang pagsusugal online. Pero maraming pag-aaral na ang nagpapakitang ang pagsusugal ay maaaring humantong sa pagkabaón sa utang, matinding stress at mental health issues, pagkasira ng pamilya, at pagkalulóng sa sugal na mahirap nang takasan.

Dito lalong nagiging mahalaga ang papel ng mga influencers. Kamakailan ngna, kinilala pa bilang “Best Public Service Show” ang programa ng social media influencer na endorser din ng online gambling. Kapag ganito kalaki ang impluwensya ng isang personalidad, mas malaki rin ang pananagutan niyang gamitin ang kanyang plataporma nang may pag-iingat.

Hindi maliit ang problema ng pagsusuggal. Ayon sa PAGCOR, umabot na sa mahigit 32 milyon ang tinatawag na electronic gaming players sa Pilipinas. Tinatayang mahigit 100 bilyong piso ang kinikita ng pamahalaan mula sa online gambling kada taon. Gayunman, kinikilala rin mismo ng PAGCOR ang panganib nitogaya ng iresponsableng pagkaubos ng pera, pinansyal at emosyonal na paghihirap, pagkasira ng pamilya, at matinding kalungkutan. Sinasabi ng gobyernong hinihigpitan nito ang ilang online gambling services, kabilang ang pagtanggal ng in-app gambling access sa ilang mobile payment applications. Naglunsad din ang PAGCOR ng National Problem Gambling Helpline upang magbigay ng libreng counseling sa mga dumaranas ng gambling addiction. 

Pero sapat na ba ang mga ito kapag nalulong na sa online gambling ang isang tao?

Nananawagan ang Catholic Bishops’ Conference of the Philippines (o CBCP) para sa mas mahigpit na aksyon laban sa online gambling. Inilarawan nila ang pagsusugal online bilang isang ”morál at panlipunang krisis“ at nagbabaláng isa na itong bagong virus na sumisira sa mga tao, pamilya, at lipunan. Dagdag pa ng CBCP, kasalanan ang pagsasamantala sa kahinaan ng mga tao para lamang kumita, lalo na kung mga kabataan at mahihirap ang pangunahing naaapektuhan.

Paalala rin sa atin ng Lucas 12:15: “Mag-ingat kayo sa lahat ng uri ng kasakiman, sapagkat ang buhay ng tao ay wala sa dami ng kanyang kayamanan.” Kapag ang perang dapat sana ay pambili ng pagkain, pambayad ng kuryente, o pampaaral ng mga anak ay napupunta sa pagsusugal, magdurusa ang buong pamilya.

Mga Kapanalig, hindi dapat maging kapalit ng pagkakataong manalo ng isang smartphone ang pagpapakita ng suporta sa online gambling. Kasabay ng malaking impluwensya ay malaking pananagutan. Gamitin sana ng mga influencers na may milyun-milyong followers ang kanilang plataporma sa tunay na mabuti sa halip na gawing pangkaraniwan ang isang gawaing kayang sumira ng buhay. Hindi lahat ng ligal ay tama, kaya hindi natin dapat hayaang maging normal ang online gambling dahil kinabukasan ng maraming Pilipino ang maaaring maging kapalit nito.

Sumainyo ang katotohanan.

Pax Silica

 61,100 total views

Mga Kapanalig, hindi man natin namamalayan, nagiging parte naang artificial intelligence (o AI) ng ating pang-araw-araw na buhay. Pero anong uri ng kinabukasan ang ating binubuo gamit ang AI—at ano ang magiging kapalit nito? 

Abril ngayong taon nang sumali ang Pilipinas sa Pax Silica, isang inisyatibang pinangungunahan ng Estados Unidos na naglalayong palakasin ang pandaigdigang supply chain para sa AI. Layunin nitong bawasan ang pagdepende sa China, na nangunguna ngayon sa produksyon at pagproseso ng mahahalagang mineral at iba pang materyales na kailangan sa makabagong teknolohiya.

Sa pagsali ng Pilipinas, naglaan ang pamahalaan ng humigit-kumulang 1,620 na ektaryang lupa sa New Clark City sa Tarlac—halos kasinlaki ng Pasay City—para sa kauna-unahang “AI-native industrial acceleration hub.” Doon gagawin ang mga semiconductors na gagamitin naman sa mga computer chips na inilalagay sa mga electronics. Doon din ipoproseso ang mga critical minerals na gagamitin sa paggawa ng mga baterya, semiconductor, at iba pang makabagong teknolohiya. Itatalaga ito bilang isang Economic Security Zone (ESZ) sa ilalim ng joint governance framework na kasalukuyang pang isinasapinal ng Pilipinas at US.

Nitong Hulyo, muling umingay ang usapin tungkol sa Pax Silica matapos ihayag ni Finance Secretary Frederick Go na itinuturing ni US Ambassador to the Philippines Lee Lipton na “top priority” ang inisyatiba. Dahil dito, minamadali na nila ang pagbuo ng naturang joint governance framework. Target ng dalawang panig na maisapinal at maisapubliko ito sa ASEAN Summit sa Nobyembre, na inaaasahang dadaluhan ni US President Donald Trump.

Ayon sa pamahalaan, isang pambihirang pagkakataon ang mapasali sa Pax Silica para makasabay ang Pilipinas sa mabilis na pag-unlad ng teknolohiya at AI. Ipinangako rin nitong hindi lamang lilikha ng libu-libong trabaho at magpapasok malaking kita ang inisiyatiba, kundi maghihikayat din ng mas maraming mamumuhunan, kumpanya, at inobasyon.

Ipinaaalala sa Catholic social teaching ni Pope Leo XIV na Magnifica Humanitas na ang paggamit ng AI ay hindi “purely technical” lamang. Kapag ang proseso sa likod ng AI ay negatibo nang nakaaapekto sa ating buhay, lipunan, at kapaligiran, hindi na sumasapat ang anumang pangako na trabaho, pamumuhunan, at inobasyon. 

Pinangangambahan kasi ang negatibong epekto ng mga data centers na kailangan sa AI. Ang mga data centers na nagsisilbing “utak” ng AI ay kailangang palamigin gamit ang hanggang limang milyong galon ng tubig kada araw—katumbas ng pang-araw-araw na pangangailangan ng isang munisipalidad na may 10,000 hanggang 50,000 residente! Siyempre, gagamit din ang mga data centers ng maraming kuryente. Kapos na nga tayo ngayon sa tubig at kuryente, heto at aagawan pa tayo ng mga data centers! Dapat itong linawin ng mga nagsusulong ng Pax Silica. 

Lubos na nakababahala rin ang epekto ng AI sa ating likas na yaman. Pinangangambahang lalawak ang pagmimina ng mga critical minerals na kailangan sa paggawa ng mga teknolohiyang nagpapatakbo sa AI. Marami na sa ating mga kabundukan at kagubatan ang nakalbo dahil sa pagmimina. Ibang usapan pa ang paglawak ng mga minahan sa mga lupang ninuno ng ating mga katutubo. Ano pa ang matitira kung lalo pang lalawak ang mga ito?

Mga Kapanalig, paalala sa atin sa Genesis 2:15 na inilagay ng Panginoong Diyos ang tao sa Eden upang ito ay alagaan at pagyamanin. Hindi ipinagkatiwala sa atin ang kalikasan para ubusin, kundi para pangalagaan para sa kasalukuyan at sa mga susunod na henerasyon. Ang pangangalaga sa sangnilikha ay hindi hadlang sa pag-unlad. Ito pa nga ang nagsisiguro na ang pag-unlad ay makakamit natin. Kaya manindigan tayo para sa isang pag-unlad na may pananagutan sa kalikasan, dahil ang kalikasang winawasak natin ngayon ang siya ring magtatakda ng hangganan ng ating pag-unlad bukas.

Sumainyo ang katotohanan.